İlham Əliyev Gürcüstanda açılış etdi - YENİLƏNİB

Azərbaycan prezidenti İlham Əliyev Tiflisə səfəri çərçivəsində bir sıra obyektlərlə tanış olub. APA-nın Tiflisə ezam olunmuş müxbirinin verdiyi məlumata görə, Azərbaycanın Gürcüstandakı səfirliyinin yeni binası ilə tanış olan dövlət başçısı daha sonra Mirzə Fətəli Axundov adına Azərbaycan Mədəniyyəti Muzeyində olub. Dövlət başçısı “SOCAR-Georgia” şirkətinin inzibati binasına da baş çəkib. Qeyd edək ki, prezident İ. Əliyevin səfərinin məqsədi Azərbaycan, Türkiyə və Gürcüstan prezidentlərinin iştirakı ilə bu gün Tiflisdə keçiriləcək sammitdə iştirak etməkdir.****** Azərbaycan prezidenti İlham Əliyevin rəhbərliyi ilə Azərbaycan nümayəndə heyəti Gürcüstana səfər edib.APA-nın Gürcüstana ezam olunmuş müxbiri xəbər verir ki, işgüzar xarakter daşıyan səfərin məqsədi bu gün Tiflisdə Azərbaycan, Türkiyə və Gürcüstan prezidentlərinin iştirakı ilə keçiriləcək sammitdə iştirak etməkdir. “2014 Tiflis sammiti” adlı beynəlxalq tədbir Gürcüstan parlamentinin Milli Kitabxanasında baş tutacaq. Sammitdə son 20 ildə iqtisadi, ticarət, nəqliyyat və enerji sahəsində əməkdaşlığın nəticələri nəzərdən keçiriləcək. Görüşü üç ölkə liderləri birlikdə açacaqlar. Gürcüstan, Azərbaycan və Türkiyə nümayəndə heyətləri sammitdə cari və planlaşdırılmış gələcək layihələri müzakirə edəcəklər. Sammit çərçivəsində prezidentlərin üçtərəfli və ikitərəfli görüşləri planlaşdırılır. Xatırladaq ki, "2014 Tiflis sammiti" Georgi Margvelashvilinin Azərbaycan və Türkiyəyə səfərləri zamanı planlaşdırılıb.ANN.Az