Çin ABŞ-a qarşı yeni sanksiyalar tətbiq edib

Pekinə görə, Vaşinqtonun bu qərarı "Bir Çin" prinsipini və üç Çin-ABŞ birgə bəyanatını ciddi şəkildə pozur, Çinin daxili işlərinə ciddi müdaxilə edir və ölkənin suverenliyini və ərazi bütövlüyünü ciddi şəkildə təhlükə altına alır. Bu səbəbdən Çin hakimiyyəti hərbi texnologiyalarla əlaqəli olan Amerika şirkətlərinə qarşı sanksiyalar tətbiq etmək qərarına gəlib.

Sanksiyalar çərçivəsində həmin şirkətlərin Çindəki əmlakı dondurulur, Çin vətəndaşlarına və təşkilatlarına bu şirkətlərlə əməkdaşlıq etmək və onlarla əlaqəli əməliyyatlar aparmaq qadağan olunur. Sanksiya siyahısına daxil olan şirkətlər, o cümlədən Tayvana silah istehsalı ilə bağlı yeni müqavilələr haqqında Pentaqonun məlumatlarında yer alıb.

Bundan əlavə, ABŞ-ın hərbi-sənaye müəssisələrinin altı yüksək səviyyəli rəhbəri də məhdudiyyətlərə məruz qalıb. Onlara qarşı tətbiq olunan tədbirlər şirkətlər üçün nəzərdə tutulan sanksiyalarla eynidir. Bundan əlavə, bu şəxslərə viza verilməyəcək və onların Çinə, o cümlədən Honq Konq və Makao muxtar bölgələrinə daxil olması qadağan ediləcək.

Dekabrın əvvəlində Pekin Tayvana silah satışına görə ABŞ-a "ciddi narazılıq" ifadə etmiş və Vaşinqtonu "Tayvan separatçılarına yanlış siqnallar verməkdə" günahlandırmışdı. Bu, Pentaqonun Taypeyə F-16 qırıcı təyyarələri və radarlar üçün ehtiyat hissələrinin 385 milyon dollarlıq satışı ilə bağlı razılığı təsdiqləməsindən sonra baş verib.