Koronavirus pandemiyası ilə əlaqədar Azərbaycan telekanallarında jurnalistlərin vətəndaşlara yaxınlaşıb amiranə şəkildə onlardan maska, əlcək taxmalarını tələb etmələri və evdən çıxma səbəblərini soruşmadan bu əmələ görə aşağılamaları artıq adi hala çevrilib. Belə videoreportajlardan biri isə bu gün sosial şəbəkədə xüsusi tənqidə məruz qalıb. Dünya TV-nin Sumqayıt şəhərindən hazırladığı video sorğu qınanıb:
Bəs görəsən jurnalistlərin özlərini belə aparması nə dərəcədə jurnalistikanın etika kodeksinə uyğundur?
Turan informasiya agentliyinin rəhbəri
Mehman Əliyev bildirir ki, vətəndaşlara bu formada yanaşmaq qəti doğru deyil.
"Jurnalist küçə sorğusu zamanı ilk
olaraq özünü və hansı redaksiyanın nümayəndəsi olduğunu təqdim etməlidir. Daha
sonra isə müsahibə götürmək üçün icazə almalıdır. Danışıq kifayət qədər mülayim
və normal olmalıdır. Daha sonra suallarını verməlidir. Bu sorğuda görünür ki,
jurnalist qarşılıqlı gərginlik yaradır. Jurnalist çöldə gəzmək olmaz sözünü o
formada deyir ki, sanki heç kimə gəzmək olmaz durumunu
yaradır. Verdiyi suallar çaşdırıcıdır və düzgün deyil. Hətta ziddiyət təşkil
edir. Çünki sujetin sonunda jurnalist deyir ki, Bakı və Sumqayıt ərazisində gəzmək
sərbəstdir. Əgər sərbəstdirsə bu nə sualdır verirsən?", - deyə Mehman Əliyev vurğulayır.
Onun sözlərinə görə, jurnalistin maska taxmamaq səbəbindən vətəndaşı qınamağa haqqı yoxdur. "Jurnalist sual verir ki, maska
niyə taxmırsız? Mən şəxsən 5-6 aptekə getmişəm maska tapa bilmirəm. Jurnalist maskanin
olmadığını demir və burda yenə çaşdırıcı durum yaranır. Sanki maska var, ancaq
insanlar onu taxmır. Yaxşı olar ki, jurnalist özü apteklərə girsin görsün maska
var ya yox? Sujet qərəzlidir. Davranış qaydaları da pozulub”, - deyir Mehman Əliyev.
"Bakı Press Klubu"nun rəhbəri Arif Əliyevin sözlərinə
görə isə, küçə sorğularında çox ehtiyatlı olmaq lazımdır.
Jurnalistin o şəraitdə davranışı doğru deyil.
"Mən o cür jurnalistlərin
davranışına olan təpkini anlayıram və xeyli dərəcədə düzgün hesab edirəm.
Birincisi, jurnalistin o şiddətlə insanların üzərinə getməsi düzgün deyil. Burda
adi qaydalar da pozulub. İkinci jurnalist həm tibbi qaydaları, həm də dövlət
orqanlarının qoyduğu tələbləri dəqiq bilməlidir. Sualların bir qismindən görünür ki, jurnalist heç özü bilmir nə qadağan olunur, nə tövsiyyə edilir. Üçüncüsü ,tnunla razıyam ki, bir çox hallarda müdafiə vasitələrindən istifadə etməyən
insanın özünün günahıdır. Əlbəttə bizim vətəndaşlarda o laqeydlik
qeyri-ciddilik var. Bu problemdir. Amma biz görürük
ki, insanlar o müdafiə vasitələrini əldə etməyə çətinlik çəkir. Elə həmin
jurnalistlər özləri girib 10 aptekə çəkiliş etsinlər. Görək maska, əlçək tapa
biləcəklərmi? Ona görə bu cür küçə sorğuları edəndə biraz ehtiyatla yanaşmaq
lazımdır. İnsanlarla davranış qaydalarına fikir verilməlidir" - deyə o, bildirib.
Filologiya
elmləri doktoru, professor Qulu Məhərrəmlinin fikrincə isə bu cür
sorğuları uğurlu adlandırmaq doğru deyil.
"Əlbəttə, niyyət yaxşıdır, amma
bunu uğurlu sorğu adlandırmaq çətindir. Müxbirin soruşma tərzi və "niyə”lərdə təkid
etməsi qıcıqlandırıcıdır. Ümumiyyətlə reportaj evdə qalmaq, səbəbsiz yerə küçələrə
çıxmamaqla bağlı vacib mesajlar verir, lakin suallar üçün düzgün intonasiya
seçilməyib. Məsələn, polis adamlara buna bənzər suallar verə bilər, amma
reportyorun buradakı davranışı bir az fərqli olmalıdır. Belə nümunələr göstərir
ki, reportyorlar bir az kreativ olmalı, küçə sorğularında istintaq sualları
yağdırmaqdan çəkinməlidirlər”.
Gülnar Nazimqızı
Bizi sosial şəbəkələrdə izləyin !