İnvest.az platformasında maliyyə fırıldaqları aşkarlanıb
28.01.2025 15:01
Bakıda Ağır Cinayətlər Məhkəməsində AzTV-nin keçmiş sədri Arif Alışanovun yaxın qohumu Nizami Alışanın cinayət işi üzrə məhkəmə prosesi davam edib.
O, investisiya platformasında valyuta əməliyyatları vasitəsilə gəlir əldə etməyə çalışan üç nəfərin böyük məbləğdə pulunu mənimsəməkdə ittiham olunur.
Hakim Aytən Əliyevanın sədrliyi ilə keçirilən məhkəmə iclasında prokuror ittiham aktını elan edib.
İttihama əsasən, Alışan, İnvest.az platformasından istifadə edərək investisiyalardan gəlir əldə etmək vədi ilə zərərçəkənlərin vəsaitlərini cəlb edib, lakin vədini yerinə yetirməyib.
Nizami Alışan məhkəmədə ittihamları rədd edib. Onun vəkili Samir İsayev, 2024-cü il aprelin 9- 17 tarixlərində mobil operatorlardan məlumatların tələb olunması barədə vəsatət qaldırıb. Digər bir vəsatət isə İnvest.az şirkətinin nümayəndəsinin məhkəməyə şahid qismində çağırılması ilə bağlı olub.
Məhkəmə kollegiyası hər iki vəsatətin sübutların araşdırılması mərhələsinə aid olduğunu bildirərək, onların həmin mərhələdə nəzərdən keçiriləcəyini açıqlayıb.
Məhkəmə prosesi fevralın 10-da davam edəcək.
Məhkəmə materiallarına əsasən, bu cinayət işi üzrə Zeynal Usubov, Babək Məmmədzadə və Yədigər İsrafilov zərərçəkmiş kimi tanınıblar.
Zərərçəkənlərdən biri Zeynal Usubov 2023-cü ildə prokurorluq orqanlarından çıxarılıb, digər zərərçəkən Babək Məmmədzadə isə "Aztelekom” MMC-nin keçmiş baş direktoru olub.
İttihama görə, Nizami Alışan özünü səhmlər və valyuta əməliyyatları üzrə mütəxəssis kimi təqdim edib və ümumilikdə 2 milyon 445 min dollar (4 milyon 156 min 500 manat) məbləğində vəsaiti mənimsəyib.
O, Babək Məmmədzadədən 1 milyon 300 min dollar, Zeynal Usubovdan 945 min dollar, Yədigər İsrafilovdan 200 min dollar mənimsəyib.
Nizami Alışana qarşı Azərbaycan Respublikasının Cinayət Məcəlləsinin 178.4-cü maddəsi (xüsusilə külli miqdarda ziyan vurmaqla dələduzluq törətmə) ilə ittiham irəli sürülüb.
Aytac Zeynalova
www.anews.az
Foto 
Video 
