iPhone sahibləri App Store-da saxta oyun barədə xəbərdarlıq ediblər

App Store-da istifadəçilərin şəxsi məlumatlarını oğurlayan və onlardan pul almağa çalışan Baldur's Gate 3-ün iPhone və iPad üçün saxta versiyası peyda olub. Bu barədə AppleInsider portalı məlumat yayıb.

Qeyd olunur ki, saxta oyunu pulsuz yükləmək mümkündür, lakin quraşdırıldıqdan sonra istifadəçidən 30 dollara abunə olmağı xahiş olunur və ödənişdən sonra heç nə baş vermir.

Həmçinin qeyd edilir ki, hətta proqramın quraşdırılmasından dərhal sonra silinməsi istifadəçi haqqında məlumatların, o cümlədən onun İP ünvanının toplanmasına mane olmur. Buna görə də mütəxəssislər bu və buna bənzər proqramları hətta maraqdan yükləməməyi tövsiyə edirlər.

Baldur's Gate 3 heç vaxt mobil cihazlar üçün buraxılmayıb. Larian Studios oyunu smartfon və planşetlərə köçürməyi planlaşdırmır. Layihə rəsmi olaraq yalnız MacOS-da Apple M1 çipi və daha sonra Windows, PlayStation 5 və Xbox Series X/S olan cihazlarda mövcuddur.



www.anews.az