İraqda Azərbaycanın Ticarət Evinin açılması planlaşdırılır. Bunu İxracın və İnvestisiyaların Təşviqi Agentliyinin (AZPROMO) icraçı direktoru Yusif Abdullayev Bakıda keçirilən Azərbaycan-İraq biznes forumunda deyib.
O, həmçinin qeyd edib ki, gələn il Azərbaycandan ticarət və ixrac missiyası İraqa səfər edəcək.
Azərbaycan-İraq biznes forumunda Azərbaycandan 50-yə yaxın, İraqdan isə 15 şirkət iştirak edir.
Abdullayev İraq şirkətlərini noyabrın 14-də Bakıda COP29 çərçivəsində investorlar üçün keçiriləcək tədbirlərdə iştirak etməyə dəvət edib.
KOBİA-nın sədri Orxan Məmmədov bildirib ki, ticarət evinin açılması Azərbaycan məhsullarını İraq bazarına ixracını artıracaq.
"KOBİA olaraq Azərbaycan məhsullarını İraq bazarına ixrac məsələsinin genişləndirilməsini, eləcə də müxtəlif çeşidli yerli məhsulların daha geniş istehlakçı auditoriyasına çatdırılması məqsədilə İraqda ticarət evinin açılması əhəmiyyətlidir. Bu platforma gələcəkdə ticarət dövrüyyəsinin dinamikasına müsbət təsir edəcək", -Məmmədov bildirib.
2023-cü il noyabrın 20-də İraq Prezidenti Əbdül Lətif Rəşid Azərbaycana rəsmi səfərə gəlib. Səfər zamanı ticarət və enerji, viza rejiminin sadələşdirilməsi məsələləri müzakirə olunub.
Ölkələr arasında 5 sənəd, o cümlədən Ticarət, İqtisadiyyat, Elm, Texnologiya və Mədəniyyət sahələrində əməkdaşlıq haqqında Saziş (10 noyabr 2010-cu il) və Hava əlaqəsi haqqında Saziş (20 noyabr 2023-cü il) imzalanıb.
2023-cü ilin sonunda iki ölkə arasında ticarət dövriyyəsi 19,6 milyon ABŞ dolları təşkil edib. Azərbaycan İraqdan bitki və heyvan mənşəli yağ və piylər, şəkər, kağız, karton, karton məmulatları, kakao alır.
Bakı-Bağdad reysləri 2023-cü ilin noyabr ayından həyata keçirilir.
2024-cü il fevralın 2-dən Bakı - Kərkük marşrutu üzrə uçuşlar başlayıb. Uçuşlar İraq Hava Yolları tərəfindən həyata keçirilir. Həmçinin Bakıdan Ərbil və Bəsrəyə uçuşların başlanması planlaşdırılır.
Gülnar
www.anews.az
Bizi sosial şəbəkələrdə izləyin !
