İtaliyada beynəlxalq qeyri-qanuni yayım şəbəkəsi aşkarlanıb

İtaliya polisi digər Aİ ölkələrinin hüquq-mühafizə orqanları ilə birlikdə 22 milyondan çox insanın istifadə etdiyi beynəlxalq qeyri-qanuni yayım şəbəkəsini aşkar edib. Bu barədə Fanpage Kataniya polisinə istinadən xəbər verir.


Açıqlamaya görə, bu, İtaliya və Avropada audiovizual sektorda həyata keçirilən ən böyük antipirat əməliyyatı olub. Belə ki, İtaliya polis bölməsinin kibercinayətlərin araşdırılması üzrə ixtisaslaşmış 270-dən çox əməkdaşı ölkənin 15 regionunda 89 axtarış aparıb.


Beynəlxalq əməkdaşlıq çərçivəsində Böyük Britaniya, Hollandiya, İsveç, İsveçrə, Rumıniya və Xorvatiyada da 14 axtarış aparılıb.


Xorvatiya polisinin qeyri-qanuni yayım şəbəkəsində iştirakda şübhəli bilinərək 11 nəfəri saxladığı bildirilir.


İtaliya polisi hələlik bütün məlumatları açıqlamayıb, noyabrın 27-nə planlaşdırılan mətbuat konfransı çərçivəsində əməliyyatın təfərrüatlarını açıqlamağa söz verib.



www.anews.az