İncəsənət təhsilində tədris məzmunu yenilənib – nazir

Son iki ildə incəsənət təhsilində əsas istiqamətlərdən biri tədris məzmununun yenilənməsi olub.

Bunu mədəniyyət naziri Adil Kərimli Milli Məclisin Elm və təhsil komitəsinin “İncəsənət məktəblərinin mövcud vəziyyəti və inkişaf perspektivləri” mövzusunda keçirilən ictimai dinləmədə çıxışı zamanı deyib.

Nazirin sözlərinə görə, əksər ixtisaslar üzrə tədris proqramları yenilənib, bütün ixtisaslar üzrə tədris planları isə müasirləşdirilib.

O qeyd edib ki, ilk dəfə olaraq incəsənət məktəbləri üçün fortepiano ixtisası üzrə dərslik hazırlanıb.
“Bu dərslik incəsənət təhsilində vahid metodoloji yanaşmanın formalaşdırılması baxımından mühüm addım hesab olunur”, – nazir bildirib.

Adil Kərimli əlavə edib ki, hazırda digər ixtisaslar üzrə də yeni dərsliklərin hazırlanması istiqamətində işlər davam etdirilir.

Gülnar Nazimqızı