Lənkəran-Astara Regional Təhsil İdarəsində metodist vəzifəsində çalışan Nuranə Əliyeva ixtisara salınıb. Bu barədə o, Anews.az-a ünvanladığı şikayətində bildirib.
Onun sözlərinə görə, işdən çıxarılmasına səbəb qurumun daxilində fəaliyyət göstərən metodiki kabinetin bağlanması olub.
"İdarədə metodiki kabinetlər bağlandığı üçün kargüzarlar və metodistlər işdən azad olunub. Bizi işlə təmin edəcəklərini desələr də, hələlik ortada heç nə yoxdur. Əvvəldən məktəbdə dərs deyən bəzi kargüzar və metodistlər isə müəllimlik fəaliyyətini davam etdirir. Bu onların əlavə işlə təmin olunması demək deyil. Mənim yerimə alı təhsili olmayan bir yaşlı xanım kargüzar vəzifəsinə təyin olunub. Rayonun özündə nə qədər boş vakansiya var. Ancaq bizi işlə təmin etmirlər. İnsanları aldadırlar. Saytlarda yalan məlumatlar yayırlar ki, guya bütün metodistlər işlə təmin olunub. İşlə təmin olunanlar onsuz da, həmin məktəbdə çalışan müəllimlər olub. Mən ali təhsil almışam. Ancaq metodist müəllim kimi çalışmamışam. Mənimlə bərabər altı nəfər bu problemi yaşayır. Lənkəranda üç nəfər metodist işlə təmin olunub. Onun da birini fəhlə kimi işə götürüblər. Düşünün ki, metodis fəhlə kimi işləyir. Mənim özümə də əvvəlcə fəhlə, sonra xadimə işi təklif olunub. Ali savadlı şəxs olaraq, əlbəttə bu təklifi qəbul edə bilmərəm", - Nuranə Əliyeva bildirib.
Məsələ ilə bağlı Lənkəran-Astara Regional Təhsil İdarəsinin ictimaiyyətlə əlaqələr şöbəsinin əməkdaşı Tural Kərimov Nuranə Əliyevanın işlə təmin olunması məsələsinə münasibət bildirməkdən imtina edib.
Nuranə Əliyeva xadiməlik təklifindən gələn həftənin birinci günü imtina edəcəyini bildirib.
"Mən imtina qərarımı onlara birinci gün deyəcəm. Mənə dedilər ki, adın xadimə kimi gedəcək. Ancaq başqa işlərdə işləyəcəksiz. Digər işçilərə də bu təklifi ediblər. Təbii ki, biz qəbul etməyəcəyik", - Əliyeva vurğulayıb.
Azərbaycan Respublikasının əmək qanunvericiliyinə görə, işçini bir vəzifəyə götürüb başqa sahədə işlətmək qəti qadağandır.
Aytac Zeynalova
www.anews.az
Bizi sosial şəbəkələrdə izləyin !
