Livanın paytaxtı Beyrut yaxınlığında Hizbullah- şiə üsyançı qruplaşmanın liderlərindən biri öldürülüb, qruplaşmanın məlumatında deyilir.

Hassan Lakkis paytaxtın cənub şərqində 7 kilometr uzaqlıqda yerləşən Hədəs vilayətində evinin yaxınlığında “öldürülüb", Hizbullah TV kanalı Al-Manar bildirib.

Qruplaşma ölümə görə İsraili günahlandırıb. Israil rəsmiləri isə məsələ ilə bağlı açıqlama verməyib.

Hadisə, Hizbullah lideri Hassan Nasrallah-ın ötən ay Beyrutdakı İran səfirliyinin bombalanmasının arxasında Səudiyyə Ərəbistanının dayandığını açıqlamasından sonra baş verib.

Hizbullahın əsas dəstəkçisi olan İran Suriyaya Bəşər Əl- Əsəd hökümətinə yardım üçün hərbçilər göndərib.

Suriya konflikti qonşu ölkədə də təriqətçi gərginliyinə səbəb olub.

Hizbullah TV kanalında yayımlanan açıqlamada deyilir ki, Lakkis gecə yarısı işdən evə qayıdarkən öldürülüb.

Qruplaşma bildirib ki, İsrail bir neçə dəfə də öldürməyə çalışsa da, uğursuzluqla üzləşib.

BBC müxbiri Jim Muir bildirib ki, Lakkis ictimaiyyətə az tanınsa da, Hassan Nasrallahın yaxını olub.

Livan təhlükəsizlik rəsmiləri bildirib ki, yerdə uzanmış silahlı şəxslər Lakkisin maşınından endiyini görən kimi ona güllə atıb, Associated Press məlumat yayıb.

Adını bildirmək istəməyən rəsmi deyib ki, Lakkis çoxlu yaşayış evlərinin arasında maşın saxlama ərazisində vurulub. O, yaxınlıqdakı xəstəxanaya çatdırılsa da, bu səhər yaralara görə vəfat edib.

Hizbullah və ya "Allahın Partiyası" - Livanda əsasən şiə müsəlmanlarına aid güclü siyasi və hərbi təşkilat sayılır.

BBC Azərbaycan