"Baş məqşçimiz Çeslav Mixneviç çox açıq insandır. Onda qalib gələn düşüncə tərzi var. Bu tərzi inanan, inkişaf edən və bir çox oyunu qazanan biləcək komandaya gətirir".

Bu fikirləri Polşa "Legiya"sında çıxış edən Azərbaycan millisinin futbolçusu Mahir Emreli klubun rəsmi instaqram hesabında canlı yayım zamanı deyib.

24 yaşlı hücumçu bildirib ki, Mixneviç oyunçularla çox yaxşı ünsiyyət qurur: "Bu, oyunçular üçün çox vacibdir. Əlbəttə, meydanda və meydandan kənarda nə etməyiniz önəmlidir. Baş məşqçi ilə yaxşı ünsiyyətin olması oyunçular üçün müsbət haldır. Çünki belə insan üçün meydanda ürəyinizi verə bilərsiniz. Bu baxımdan, hamı Mixneviçi sevir".

Forvard "Meydanda başqa bir hücumçu ilə yan-yana oynamağı üstün tutursunuzmu" sualına belə cavab verib: "Demək çətindir. Bu, komandanın necə oynamasından asılıdır. "Qarabağ"da oynayanda hücumçda tək olmaq mənim üçün daha asan idi. Mənə köməklik göstərən yaxşı cinah oyunçularımız var idi.

 

"Legiya"da bir az fərqli oynayırıq. Hər gün daha çox öyrənəcəyəm. İştirak etdiyim son yoxlama görüşündə digər hücumçu ilə özümü rahat hiss etdim. Ancaq dediyim kimi, bu, vəziyyətə görə dəyişir".

Emreliyə onun anası Elnurə Emreli də sual ünvanlayıb. Anası özünün, yoxsa klubun aşpazının yeməklərinin daha yaxşı alındığını soruşub. Futbolçu bu suala cavab verməyin çox çətin olduğunu sözlərinə əlavə edib: "Diplomatik cavab verəcəyəm. Ənənəvi Azərbaycan yeməklərindən danışanda anamın hazırladıqları prioritetdir. Bununla birlikdə, idmançılar üçün faydalı yeməklərdən danışırıqsa, klubun aşpazını göstərəcəyəm".

Hücumçu Varşavaya gəlməzdən əvvəl klubun azarkeşlərinin iştirak etdiyi videolara baxdığını söyləyib: "Belə atmosferdə olmaq istərdim. "Legiya" fanatlarının stadionda şou göstərdiklərini eşitmişəm. Düzü, burada olduğum birinci gündən azarkeşlərin önündə oynayacağım ilk matçı səbrsizliklə gözləyirəm".

O, canlı yayımda xoşladığı 5 klubun adını da açıqlayıb: "Qalatasaray", çünki gənc vaxtlarımda ilk olaraq, bu komandanın matçlarını izləmişəm. "Barselona"nı oyun tərzinə görə bəyənirəm. Digərləri isə "Mançester Siti", "Bavariya" və PSJ-dir. Çempionatlardan isə La Liqanı sevirəm. Amma açığı, İngiltərə Premyer Liqasını da qeyd etməliyəm".

Emreli "2025-ci ildə özünüzü harada görürsünüz" sualına maraqlı cavab verib: "Əlbəttə, bu, beş klubdan birində. Həyat gözlənilməzdir. Məqsədim inkifat etmək və dünənkindən daha yaxşı olmaqdır".

Forvard müqavilə imzalamamışdan bir ay əvvəl Varşava təmsilçisinin onunla maraqlandığını bildirib: "Təkliflərim çox, qərar vermək çətin idi. Daha əvvəl ardıcıl 7 dəfə Azərbaycan çempionu olan "Qarabağ"da oynamışam. Kuboklar uğrunda mübarizə aparan komandada olmaq istəyirdim. Buna görə "Legiya"nı seçdim. Bu, tarixə sahib olan klubdur. Avropa kubokları uğrunda mübarizə apara bilmək mənim üçün də vacib idi".