Bu gün dünyada Onkoloji xəstəliklərlə mübarizə günü kimi qeyd edilir. Biz də Anews.az saytı olaraq bu tarixlə bağlı reportajımızı Milli onkoloji mərkəzin qarşısından, ölkəmizdə dünya standartlarına cavab verən belə bir tibb ocağının olduğunu söyləməklə başlamağa hazırlaşmışdıq. Amma sən saydığını say, gör çərxi fələk nə sayır. Görünür özünü nəinki xəstəxana daxilində , həm də xaricində ağa hesab edən mərkəzin mühafizə xidmətinin rəhbəri bütün planlarımızı alt-üst etdi. Xəstəxananın binasına, hətta həyətinin ərazisinə daxil olmaq istəyimiz belə olmadığı təqdirdə mühafizə xidmətinin rəhbəri müxbirlərimizə qarşı kobudluq edərək Mərkəzin darvazasının qarşısında dayanmağı belə qadağan edib.
KİV haqqında qanunu pozduğunu, jurnalıistlərin fəaliyyətini məhdudlaşdırmağa cəhd etdiyini dərk etməyən mühafizə rəhbəri hətta müxbirlərimizi məhkəməyə verməklə hədələyib.
Onu da qeyd edək ki, çəkiliş etmək üçün müxbirlərimiz Səhiyyə Nazirliyinin mətbuat xidmətindən icazə alıb və xidmətin əməkdaşı Elvin Hacıyev bildirib ki, xəstəxananın içərisində çəkiliş etmirlərsə heç bir icazəyə ehtiyac yoxdur. Amma mühafizə xidmətinin rəhbəri mərkəzin qapısına vurulan lövhə ilə xəstəxananın içinin eyni olmadığını deyəsən qarışdırıb. Adı çəkilən lövhəni reklam adlandıran rəis nazirliyin mətbuat xidməti əməkdaşının sözünu saymırsa onda nazirlik o xidməti görəsən niyə saxlayır?
Jurnalistlərə qarşı bu qədər kobudluq edən mühafizəçi görəsən xəstələrlə necə davranır? Güman edirik ki, ilk növbədə Səhiyyə Nazirliyi, daha sonra isə uyğun təşkilatlar mühafizə rəisi ilə bağlı ölçü götürəcək və həmin şəxs bundan sonra ölkə qanunlarını pozmaq kimi özbaşınalığa yol verməyəcəkdir.
Azərbaycan qanunvericiliyinə görə, mühafizə xidmətinin rəisi ictimai fiqur sayıldığından onun əməllərini olduğu kimi videoya çəkərək mühakimənizə təqdim edirik:
www.anews.az
Bizi sosial şəbəkələrdə izləyin !
