Milyarderlər Trampın ayağına gəlib

 

Bu milyarderlər ABŞ-ın və dünyanın müxtəlif yerlərindən, o cümlədən Havay, Kaliforniya, Texas və hətta Mayamidən xüsusi təyyarələrlə gəlirlər.

 

Uçuş məlumatları göstərir ki, onlar Trampın şəxsi klubu olan Mar-a-Laqoya səfər edərək onunla görüşürlər. Bloomberg-in yazdığına görə, əvvəllər Trampa qarşı çıxan Mark Zukerberq, Sergey Brin və Ceff Bezos kimi milyarderlər indi onunla münasibətləri yaxşılaşdırmağa çalışır.

Mark Zukerberq (xalis sərvəti – 217 milyard dollar) noyabrın sonunda Tramp ilə fikir ayrılıqlarına baxmayaraq klubu ziyarət edib. Sergey Brin (163 milyard dollar) isə dekabrda Alphabet-in prezidenti və baş direktoru Sundar Pichai ilə birlikdə Palm-Biçə gəlib. Ceff Bezos (245 milyard dollar) və İlon Mask (449 milyard dollar) da Mar-a-Laqoda Tramp ilə müzakirələr aparıblar. Bezos Trampın inauqurasiyası üçün 1 milyon dollar bağışlayacağını vəd edib, Mask isə Zukerberq kimi rəsmi qəbulda iştirak edəcək.

Bundan əlavə, Palm-Biçi Travis Kalanik (5 milyard dollar), Larri Ellison (188 milyard dollar), həmçinin kriptovalyuta maqnatları Kameron və Tayler Vinklvos (hər biri 6 milyard dollar) da ziyarət ediblər. Onlar Tramp üçün təşkil edilən xeyriyyə tədbirində iştirak ediblər.

 

Mədən sənayesi maqnatı Cina Raynhart (20 milyard dollar) da klubu ziyarət edənlər arasındadır. Kazino maqnatı Stiv Uin (5 milyard dollar) isə Trampın kampaniyasına dəstək verib.

Digər milyarderlər, o cümlədən Hovard Lütnik (2 milyard dollar) və Tilman Fertitta (16 milyard dollar) da Tramp ilə görüşmək üçün mütəmadi olaraq Palm-Biçə səfər edib.