Mnatsakanyan: "Ermənistan Qarabağ münaqişəsini kompromis əsasında həll etməyə hazırdır"

Ermənistan, Qarabağ münaqişəsinin qarşılıqlı kompromislər əsasında sülh yolu ilə həll edilməsinin tərəfdarıdır. Bunu respublikanın xarici işlər naziri Zohrab Mnatsakanyan France 24 telekanalına verdiyi müsahibəsində deyib.


"Biz beynəlxalq miqyasda tanınmış bir formatın - Fransa, ABŞ və Rusiyanın iştirakı ilə ATƏT-in Minsk Qrupunun mövcud olduğu Qarabağ münaqişəsinin müstəsna şəkildə sülh yolu ilə həllinə sadiq idik və qalırıq. Bu prosesə sadiqik - bu münaqişəni müstəsna şəkildə sülh yolu ilə həll edək və yalnız qarşılıqlı güzəştlər əsasında bunun həllini tapaq", - deyib Mnatsakanyan.


Onun sözlərinə görə, Azərbaycanın maksimalist mövqeyi erməni xalqının maraqlarına uyğun gəlmir.


"Belə bir mövqe qəbuledilməzdir. Qarşılıqlı güzəştlərə hazırıq. Buna baxmayaraq, bu geniş miqyaslı gərginlik qarşılaşmalı olduğumuz yeni bir vəziyyət yaradır", - deyə  Mnatsakanyan bildirib.


O, Türkiyənin Qarabağ münaqişəsindəki "dağıdıcı rolundan" da danışıb.


Mnatsakanyan onu da bildirib ki, Azərbaycan gərginlik səviyyəsini azaltmaq niyyətində deyil və erməni tərəfi özünü müdafiə etmək niyyətindədir.


"Vəziyyətin bölgə üçün çox təhlükəli olan hər cür inkişafına hazırıq, amma qətiyyətlə özümüzü qorumağa qərarlıyıq", deyə o, bildirib. 

www.anews.az