Moskvada Əfqanıstan Müharibəsi Muzeyi yaradılacaq

Moskvanın “Poklonnaya Qora” adlanan ərazisində 2016-cı ilə qədər Əfqanıstan müharibəsi, eyni zamanda Rusiya və Sovet İttifaqının hərbçilərin iştirak etdiyi digər lokal münaqişələrin muzeyin yaradılması planlaşdırılır.APA-nın “İnterfaks” agentliyinə istinadən verdiyi məlumata görə, bu təşəbbüslə Böyük Vətən Müharibəsi Mərkəzi Muzeyi və Rusiya Hərbi-Tarixi Cəmiyyəti çıxış edib. Təklif Rusiya mədəniyyət naziri Vladimir Medinski və Moskva hökuməti tərəfindən dəstəklənib. Əfqanıstan Müharibəsi Veteranları İttifaqının üzvlərinin də imzaladığı müraciət baxılması üçün paytaxt meri Sergey Sobyaninə təqdim olunub. Müraciətdə muzey üçün yerin ayrılması xahiş olunur. Böyük Vətən Müharibəsi Mərkəzi Muzeyin direktoru Vladimir Zabarovski bildirib ki, hazırda onun rəhbərlik etdiyi muzeydə sovet qoşunlarının Əfqanıstandan çıxarılmasının 25 illiyinə həsr olunan sərgi təşkil olunub. Sərgidə sənədlər, şəkillər, hərbçilərin silahları və ləvazimatların nümunələri nümayiş etdirilir. Muzey direktoru əlavə edib ki, Əfqanıstan Müharibəsi Muzeyinin yaradılması çox vacib məsələdir. Bundan əvvəl isə Rusiyanın Əfqanıstan Müharibəsi Veteranları İttifaqı ölkənin ali rəhbərliyinə müraciət edərək, 1989-cu ildə SSRİ Xalq Deputatları Qurultayında müharibəyə verilən siyasi qiymətə yenidən baxılmasını xahiş edib. Veteranların fikrincə, müharibənin müvəffəqiyyətsiz avantüra kimi qiymətləndirilməsi hüquqi və siyasi nöqteyi-nəzərdən əsassızdır. Rusiya Müdafiə Nazirliyi isə prezident Vladimir Putinin Əfqanıstanda döyüşənlərin fədakarlığını və cəsarətini yüksək qiymətləndirdiyini əsas gətirərək, buna ehtiyac olmadığını bildirib. Qeyd edək ki, fevralın 15-də Rusiyada sovet qoşunların Əfqanıstandan çıxarılmasının 25 illiyi qeyd olunur. 9 ildən çox davam edən müharibədə 15 mindən çox sovet əsgəri öldürülüb, 53 mindən çoxu yaralanıb. Ümumilikdə isə SSRİ və Rusiya ölkə hüdudları kənarında 19 ölkədə baş verən 35 lokal müharibədə və silahlı münaqişələrdə iştirak edib. Hərbi əməliyyatlarda təxminən 1.5 milyon əsgər iştirak edib, onlardan 50 minə yaxını həlak olub.ANN.Az