ANN.Az xəbər verir ki, qurumun mətbuat xidmətinin rəhbəri Samir Sədaqətoğlu bildirib ki, "Qızıl cücə” adlanan nağıl-tamaşanın müəllifləri V. Ulyanovskiy və V. Orlovdur. Teatrın rus bölməsi tərəfindən hazırlanan səhnə əsərinin quruluşçu-rejissoru Azərbaycan Respublikasının Əməkdar artisti Svetlana Bulaxdır. "Tamaşamız uşaqları əyləndirməklə yanaşı, həm də onların intellektinin inkişafına yardımçı olacaq. Bu səhnə əsərinin çox maraqlı süjet xətti var. Bir gün tülkü eşidir ki, nənə ilə babanın kürt toyuğu qızıl yumurtanın üstündə oturub. Bunu bilən hiyləgər tülkü canavarı yoldan çıxarır və onlar əsasən canavarın iştirakıyla həmin yumurtanı oğurlayırlar. Özünü işə vermək istəməyən tülkü yenə hiyləgərlik edərək canavarı həmin yumurtanın üstündə oturdur. Tülkü və canavar düşünürlər ki, yumurtadan qızıl cücə çıxacaq, onlar bu qızıl cücəni çoxaltmaqla varlanacaqlar. Vaxt-vədə yetişir, amma yumurtadan çıxan balaca cücə fərə yox, beçə - xoruz olur. Məhz bundan sonra da tülkü ilə canavarın arasında əsl intriqa başlayır. Ümumiyyətlə, tamaşanın əsas məğzini mərhəmət, qayğı, sevgi təşkil edir. Sevginin ən qəddar məxluqu belə mərhəmətli etməsi tamaşa boyu xüsusi vurğulanır”, - deyə Svetlana Bulax bildirib.

 

Qeyd edək ki, tamaşanın rejissor-assistenti Tamilla Aslanovadır. Tamaşada rolları Əməkdar artist Svetlana Bulax, aktyorlar Marina Litvinenko, Emil Heydərov, Mehriban Zalıyeva, Rauf Babayev, Gülnarə Kərimbəyova, Yuliya Heydərova, Gülnarə Əzizova, Murad Əliyev, Roman Krasnov və Cəlalə Novruzlu ifa edəcəklər.