Bakı Biznes Mərkəzində “Azərfon” şirkəti (“Nar Mobile” ticarət nişanı) rəhbərliyi və mobil operatorun dilerlərinin iştirakı ilə ənənəvi illik toplantı keçirilib. Görüş zamanı 2014-cü ilin ilk on ayı ərzində əldə edilmiş nailiyyətlər müzakirə olunub, gələcək perspektivlər haqqında geniş fikir mübadiləsi aparılıb və yeni hədəflər müəyyən edilib. Qeyd edilib ki, bu müddət ərzində diler müqavilələrində müəyyən müsbət dəyişikliklər edilib, bonusların təqdim edilməsi prosesi və bu barədə dilerlərə mütəmadi məlumat ötürülməsi mexanizmi tənzimlənib, ödənişsiz Sim-kart dəyişmə layihəsi həyata keçirilib. Bundan başqa, bu dövrdə dilerlərin fəaliyyəti haqqında məlumat bazasını özündə əks etdirən “Dealer Web Interface” layihəsi başa çatdırılıb, hər bir dilerin şəxsi elektron “kabineti” yaradılıb. Eyni zamanda, “779” diler qaynar xəttinin iş planı təkmilləşdirilərək problemlərin həlli müddəti qısaldılıb. Bu il ərzində “1+1”, “Nar smartfonu”, “Galaxy S5” və “Nokia Lumia” kimi bir sıra yeni kampaniyaların keçirildiyi xüsusilə vurğulanıb. Tədbiri giriş sözü ilə açan “Azerfon” şirkətinin satış üzrə direktoru Leyla Nəsrullayeva mobil operatorun dilerlərinin fəaliyyətindən məmnun qaldığını bildirərək, yüksək nəticələrin əldə edilməsində onların xüsusi əməyi olduğunu vurğulayıb. L. Nəsrullayeva 2013-2014-cü illərin uğurlu satış nəticələrinə görə hər bir dilerə öz dərin minnətdarlığını bildirərək, bu tərəfdaşlığın daha sıx və davamlı olacağına, daha yüksək nəticələrin əldə ediləcəyinə inandığını görüş iştirakçılarının diqqətinə çatdırıb. Mobil operatorun 2015-ci ilə dair planları barədə söhbət gedərkən, eksklüziv diler dükanlarının yenilənməsinin və diler servis dükanlarında bir sıra dəyişikliklərin aparılmasının nəzərdə tutulduğu qeyd edilib. Sonda 2014-cü ildə ən yüksək nəticə göstərmiş dilerlərə mobil operator tərəfindən xüsusi mükafatlar təqdim edilib.ANN.Az