Nazim Bəydəmirlinin məhkəməsində keçirilən iclasda zərərçəkmiş şəxslər ifadə verib

Bakı Ağır Cinayətlər məhkəməsində sabiq deputat, iş adamı Nazim Bəydəmirlinin məhkəməsində keçirilən iclasda zərərçəkmiş şəxslər ifadə verib.

Məhkəmədə iş üzrə Ədalət Bağırov və Mürsəl İbrahimov ifadə verib.

Zərərçəkmişlər məhkəmədə Nazim bəyin onlardan pul tələb etdiyini vurğulayıb.

"Biz onunla iş ortağı olmuşuq. Nazim dedi ki, biz gədəbəyliyik. Hər şey yaxşı olacaq. Ancaq  deputat seçiləndən sonra bizimlə münasibəti dəyişdi. Mənə şər atdılar ki, guya qarajda bir xanıma təcavüz etmişəm.  Həmin xanımda bu işin içində idi. Ona 20 min manat təklif etdiyini öyrənmişəm.  Daha sonra telefonda iki kişinin intim videosunu göstərərək, dedi ki, dediklərimi etməsən, sənin də belə videon olacaq.  Məndə məcbur olub 10 min manat verdim",- zərərçəkmiş vurğulayıb.

 Bəydəmirli  isə zərərçəkmişin yalan danışdığını  vurğuladı.

Digər zərərçəkən Mürsəl İbrahimov isə Bəydəmirli ilə biznes vasitəsilə tanış olduğunu bildirib.

"Biz Nazimlə işlə bağlı münasibətimiz yaranıb. Rusiyada içki biznesi ilə məşğul olacaqdıq.  Təklifə razılaşıb, biznes şəriki olan iranlı dostundan 40 min dollar alıb,  ona verdim. Sonra isə hesab kitab edəndə ortada heç nəyin olmadığını gördüm. Mən alim adamam, hər şeyi düz danışıram” - zərərçəkmiş əlavə edib.

Bəydəmirlinin növbəti məhkəməsi iyunun 10-u davam edəcək. 

Bəydəmirli 2023-cü ilin iyulunda həbs olunub.

O, 2024-cü ilin fevralında  barəsində elan edilən cinayət işinə xitam verilməsi üçün prezidentə müraciət edib.  Nazim Bəydəmirli iyulun 4-də Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsi tərəfindən saxlanılıb. O hədə-qorxu ilə xeyli miqdarda əmlak tələb etmədə ittiham olunur. İyulun 5-də Nərimanov Rayon Məhkəməsi istintaq orqanının təqdimatına baxaraq Nazim Bəydəmirli barəsində 4 aylıq həbs qətimkan tədbiri seçib. Bu müddət daha sonra  3 ay uzadılıb. 

 

Nazim Bəydəmirli və müdafiəçiləri onun həbsini Gədəbəyin Söyüdlü kəndində baş vermiş olaylarla bağlayır. Ona qarşı Cinayət Məcəlləsinin 182.2.4 (xeyli miqdarda əmlak tələb etmək məqsədilə hədə-qorxu ilə tələb etmə- xeyli miqdarda əmlak əldə etmək məqsədi ilə törədildikdə) maddəsilə ittiham irəli sürülüb. Cinayət işinin materiallarına görə, o, pay sahibi olduğu şirkətdə şərikini görüntülərlə şantaj edib, ondan 50 min manat pul istəyib. 

 

Aytac Zeynalova