Son 10 ildə Azərbaycanda uzunömürlülük artıb. Bunu səhiyyə nazirinin müavini İlqar Qasımov "Viva la vida" uzunömürlülük üzrə beynəlxalq konqres və sərginin açılış mərasimində deyib.
"Tibb sektorunda qeydə alınan irəliləyişlər son 10 illikdə insan ömrünün uzanması ilə nəticələnib. Bu baxımdan uzunömürlü yanaşmanın həm sosial, həm də iqtisadi cəhətdən idarə olunması qaçılmazdır. Tibbin imkanlarından istifadə etməklə insanların sağlam və produktiv yaşamasına, aktiv həyat tərzi sürməsini təmin etmək mütləqdir",- nazir müavini əlavə edib.
Nazir müavini bildirib ki, Azərbaycanda səhiyyə xidmətlərinin əlçatanlığının yaxşılaşması nəticəsində ana və uşaq ölümlərinin sayında azalma var.
Dövlət Statistika Komitəsinin statistikalarına görə son 9 ildə Azərbaycanda ümumilikdə ölüm sayı 9391 nəfər çox olub.
Belə ki, 35-39 yaş arası 317 nəfər, 40-44 yaş arası 239 nəfər, 45-49 yaş arası 188 nəfər, 50-54 yaş arası 460 nəfər, 55-59 yaş arası 2719 nəfər, 60-64 yaş arası isə 5468 nəfər çox insan həyatını itirib.
Son doqquz ildə isə ana ölümü səviyyəsi 14,4%-dən 17,8% qədər artıb.
Martın 7-də Milli Məclisin deputatı Razi Nullayev Milli Məclisdə pensiya yaşının azaldılması təklifini irəli sürərkən bildirib ki, Azərbaycanda ölüm yaşı cavanlaşıb.
"Dünyada yaş həddi əsasən 65-dir. O ölkələrdə tibbi əlçatanlıq, sosial yaşayış, əmək haqları və rahatlıq bizimlə müqayisədə daha yüksək səviyyədədir. Biz özümüzü onlarla necə müqayisə edə bilərik? Biz deputatlar xalqın içindəyik, onların evlərində oluruq, şikayətlərini dinləyirik və yaşayışlarını da çılpaq gözlə görürük. Kəndlərdə, qəsəbələrdə, rayonlarda, Bakının saysız-hesabsız gecəqondularında milyonlarla əhalimiz çətin vəziyyətdə yaşayır. Onlarla yas məclislərində oluram. Yaşlanıb ölənlərin sayı çox azdır. Bütün xəstəliklər çox cavanlaşıb. 30 yaşlı cavan ürəktutmasından ölür, 20 yaşlı gəncin qan təzyiqi var, körpə uşaq onkologiya xəstəliyinə tutulur. Baxıram ki, rəhmətə gedənlərin çoxu 57-62 yaş arasındadır. Hətta qəbiristanlıqlarda bir monitorinq aparmışam və son zaman ölənlərin əksəriyyəti yaşlanmadan dünyasını dəyişənlərdir", - deputat çıxışında söyləyib.
Birləşmiş Millətlər Təşkilatının fevralda açıqladığı hesabata görə dünyada hər iki dəqiqədən bir ana ölümü baş verir.
Hesabat müəlliflərinin fikrincə, dünya ictimaiyyəti ana ölümünün azaldılması üzrə qlobal məqsədlərə nail olmaq istiqamətində irəliləyişi əhəmiyyətli dərəcədə sürətləndirməlidir. Əks halda 2030-cu ilə qədər daha 1 milyondan çox qadının həyatı risk altında olacaq.
Gülnar Nazimqızı
www.anews.az
Bizi sosial şəbəkələrdə izləyin !
