NEQSOL Holding Qarabağa 200 mln manatadək sərmayə yatıracaq

NEQSOL Holding işğaldan azad edilmiş ərazilərin bərpası və inkişafı üçün ümumilikdə 200 milyon manatadək sərmayə yatıracaq. Bu barədə Report NEQSOL Holdingə istinadən xəbər verib.

Bildirilib ki, NEQSOL Holdingin tərkibində olan "Nobel Energy” Cəbrayıl rayonunda günəş elektrik stansiyasının inşasını planlaşdırır.

 

Layihə regionun "yaşıl enerji" zonasına çevrilməsi məqsədlərinə də xidmət edəcək. Ümumi gücü 100 meqavat olan layihənin icrası nəticəsində ildə 180 milyon kilovat/saat enerji istehsalı nəzərdə tutulur, bu isə orta hesabla 58 000-ə yaxın evi elektrik enerjisi ilə təmin edəcək. Stansiyanın tikintisi zamanı 600 nəfərin, istismara verildikdən sonra isə 80 nəfərin işlə təmin edilməsi nəzərdə tutulub.

NEQSOL Holding beynəlxalq şirkətlər qrupu 11 ölkədə telekommunikasiya, enerji, tikinti və yüksək texnologiyalar sahələrində fəaliyyət göstərir.

 

2023-cü ildə noyabrın 23-ü SPECA Rəhbər Şurasının 18-ci iclasında çıxışı zamanı iqtisadiyyat naziri Mikayıl Cabbarov azad edilmiş ərazilərdə aparılan yenidənqurma və bərpa işlərinə indiyədək dövlət büdcəsindən 7 milyard dollar sərf edildiyini deyib. 2024-cü il üçün 2,4 milyard dollar ayrılması nəzərdə tutulur.

 

Maliyyə Naziri Samir Şərifov Azərbaycan 2024-cü ilin dövlət büdcəsindən Qarabağın və Şərqi Zəngəzurun bərpası üçün 2,35 milyard dollar ayrılacağını deyib. O bildirib ki, büdcə xərclərinin 10,9 %-i azad edilmiş ərazilərdə quruculuq işlərinə ayrılacaq.