APA-nın xəbərinə görə, konfransı giriş sözü ilə açan AMEA-nın İnsan Hüquqları İnstitutunun direktoru Aytən Mustafayeva bildirib ki, Azərbaycanın avroatlantik institutlarla əməkdaşlığı təhlükəsizliyin təmin olunması, demokratiyanın möhkəmlənməsinə yönəlib və prioritet təşkil edir. O qeyd edib ki, Azərbaycan coğrafi mövqeyinə görə strateji əhəmiyyətə malik olduğu üçün regional və avroatlantik təhlükəsizliyin möhkəmlənməsində xüsusi rola malikdir. 

 

Rumıniyanın Azərbaycandakı səfiri Daniel Kristian Çiobanu bu cür tədbirin Azərbaycanda keçirilməsinin mühüm əhəmiyyətə malik olduğunu vurğulayıb. Səfirin sözlərinə görə, Azərbaycanın müstəqilliyini ikinci  tanıyan ölkə olaraq Rumıniya Azərbaycanın Avropa və avroatlantik institutlarla əlaqələrinin möhkəmləndirilməsini fəal şəkildə dəstəkləyir: "NATO və Azərbaycan əlaqələri yüksək səviyyədə inkişaf edir və strateji dəyərə malikdir. NATO-Azərbaycan tərəfdaşlığı aktiv siyasi dialoqa və mühüm praktiki əməkdaşlığa əsaslanır”.

 

Diplomat qeyd edib ki, Azərbaycan Avropanın enerji təhlükəsizliyinin təminatında vacib rol oynayır: "Şimali Atlantika alyansı və Azərbaycan arasında sıx əməkdaşlıq geniş Qara dəniz-Xəzər dənizi regionunda stabillik və təhlükəsizlik üçün çox faydalıdır”.

                       

Prezident Administrasiyasının Xarici əlaqələr şöbəsinin baş məsləhətçisi Elmar Hüseynov NATO-Azərbaycan əməkdaşlığının perspektivləri baxımından bu tipli tədbirlərin vacib rol oynadığını söyləyib: "Bu gün əminlikdə deyə bilərik Azərbaycan NATO-nun ən etibarlı tərəfdaşlarından biridir”. 

 

E. Hüseynov həlli uzanmış münaqişələrin qlobal təhlükəsizliyə təhdid təşkil etdiyini deyib: "NATO-nun öz sammitlərində və yekun bəyannamələrində Azərbaycanın suverenliyinə verdiyi dəstək xüsusi əhəmiyyət kəsb edir. Varşava sammitindən isə əsas gözləntimiz yenə Azərbaycanın suverenliyi və ərazi bütövlüyünə münasibətdə bu birmənalı dəstəyin davam etdirilməsidir”.