Hesablama Palatasının yeni sədri təsdiqləndi.

Bu gün spiker Oqtay Əsədovun sədrliyi ilə Milli Məclisin növbəti iclası keçirilir. "Yeni Müsavat"-ın məlumatına görə, spiker təklif edib ki, maliyyə naziri Samir Şərifov dövlət büdcəsi haqqında qanun layihəsi barədə təkliflərə hökumətin münasibətini açıqlasın, sonra digər məsələlər müzakirə olunsun. 

S.Şərifov çıxışında dedi ki, plenar iclasında çıxış etmiş deputatlar büdcə zərfinə daxil olan qanun layihələri müzakirə edilib, təkliflər irəli sürülüb. Nazir siyasi partiyalara ayrılmış vəsaitin artırılması haqda təklifə cavabında bildirdi ki, qanuna müvafiq dəyişiklik edilməklə artıq qalan və qənaət edilən 10 faizlik əlavə vəsait partiyalar arasında bölüşdürülə bilər. 

S.Şərifov dedi ki, 2014-cü il büdcə layihəsi balanslaşdırılmış bir layihədir və deputatları layihəyə səs verməyə çağırdı. Bundan sonra büdcə zərfinə daxil olan qanun layihələri səsə qoyuldu. Gələn ilin dövlət büdcəsi (100 nəfər lehinə, 2 nəfər əleyhinə olmaqla) qəbul edildi. Həmçinin Yaşayış minimumu (101 lehinə, 2 əleyhinə olmaqla, Ehtiyac meyarı isə 100 lehinə, 2 əleyhinə olmaqla təsdiq edildi. Milli Məclisin xərclər smetasi (101 lehinə, 2 əleyhinə) də qəbul olundu. Deputatlar Hesablama Palatasının xərclər smetasını da (103 lehinə, 2 əleyhinə) təsdiqlədilər. Sosial Müdafiə Fondunun xərcləri 99 lehinə, 3 əleyhinə olmaqla qəbul edildi. 

O.Əsədov hökuməti təbrik edib onlara uğurlar arzuladı və hökumət üzvləri deputatların alqış sədaları arasında zalı tərk etdilər.  

Bundan sonra prezident sərəncamı ilə kənd təsərrüfatı naziri təyin olunan Hesablama Palatasının sabiq sədri Heydər Əsədovun öz ərizəsi ilə əvvəlki vəzifəsindən azad edilməsi, Vüqar Gülməmmədovun həmin qurumun sədri vəzifəsinə təyin edilməsi haqqında məsələyə baxıldı. İqtisadi siyasət komitəsinin sədri Ziyad Səmədzadə bu barədə məlumat verdi. Parlament çoxluğu məsələyə müsbət münasibət bildirdi.

ANN.Az