Erməni kəşfiyyatçıdan Qarabağla bağlı ŞOK AÇIQLAMA

Publika.az xəbər verir ki, Serj Sarkisyan tərəfindən həbsə atılan Samvel Babayan və Jirayr Səfilyanın azad olunması Xankəndində "Qarabağ klanı”ndan ibarət qondarma rejimin devrilməsi ilə nəticələnə bilər.

Ermənistan mediası Səfilyanın həbsdən azad olunandan sonra Xankəndinə yürüş keçirəcəyini yazıb.

Keçmiş erməni kəşfiyyatçı, hazırda siyasi fəaliyyətlə məşğul olan Vaan Badasyan inqilabın küləyinin Xankəndinə çatdığını deyib.

Onun fikrincə, Nikol Paşinyan hüquq-mühafizə strukturlarında keçmiş hakimiyyətin adamlarının təsirini nəzərə alaraq, Babayanla Səfilyanı azad etməyə tələsmir.

"Lakin bu, mütləq baş verəcək. Qarabağ keçmiş rejimin əlindədir və inqilab artıq ora doğru yaxınlaşır. Qarabağdakı ermənilər qorxu içində yaşayır və onlar Xankəndindəki mövcud rejimdən azad olmaq istəyirlər. Qarabağda rejimin dəyişməsi hava-su kimi lazımdır. Əks təqdirdə biz daha pis nəticələrlə üzləşə bilərik”, - deyə o bildirib.

Keçmiş kəşfiyyatçı "daha pis nəticələr” deyəndə nəyi nəzərə tutduğunu açıqlayıb.

O hesab edir ki, Xankəndindəki rejimin zülmü altında yaşayan ermənilər İrəvandan dəstək almasalar, başqa istiqamətə üz çevirə bilərlər.

"Bəli, bu, Bakı ola bilər. Azərbaycan rəhbərliyinin Qarabağ siyasətində prioritet istiqamətlərdən biri də oradakı ermənilərin Ermənistandan üz çevirməsini təmin etməkdir. Çünki Azərbaycan dəfələrlə Qarabağdakı ermənilərin öz vətəndaşı olduğunu və münaqişə həll olunandan sonra onların orada rahat şəkildə yaşaya biləcəyini deyir. Bu, istər-istəməz zülm altında yaşayan insanları cəlb edir. Bütün bunları nəzərə alaraq, təcili şəkildə Qarabağdakı rejimi dəyişmək lazımdır”, - deyə o iddia edib.