Azərbaycan ordusu 2 əsgərini itirdi

Onlardan biri erməni gülləsindən, digəri isə xəstəlikdən dünyasını dəyişib Azərbaycan ordusu iki hərbçisini itirib. ANN.Az saytının Müdafiə Nazirliyinin mətbuat xidmətinə istinadən verdiyi xəbərə görə, bu gün saat 14.30 radələrində erməni silahlı bölmələri atəşkəs rejimini növbəti dəfə pozaraq mövqelərimizi atəşə tutublar. Döyüş mövqeyində təhlükəsizlik qaydalarını pozduğundan Silahlı Qüvvələrimizin 1995-ci il təvəllüdlü, Ağstafa rayonundan hərbi xidmətə çağırılmış əsgəri Şəbiyev Kəramət Şəmkir oğlu düşmən tərəfindən atılan snayper atəşindən həlak olub. Hadisə ilə bağlı cinayət işi başlanıb. Hərbi Prokurorluq tərəfindən faktla əlaqədar araşdırma aparılır. Bu gün saat 13.20 radələrində Silahlı Qüvvələrimizin 1996-cı il təvəllüdlü, Yevlax rayonundan hərbi xidmətə çağırılmış əsgəri Sadıqov Pərviz Vidadi oğlu infeksion-toksiki şok, hemorragik vaskulit, visseral forma, ildırım sürətli gedişli diaqnozu ilə Silahlı Qüvvələrin Baş Kliniki Hospitalına daxil olub.  Həkimlərin səyinə baxmayaraq, onun həyatını xilas etmək mümkün olmayıb. Xəstə saat 15.35 radələrində vəfat edib.  Hadisə ilə bağlı cinayət işi başlanıb. Hərbi Prokurorluq tərəfindən faktla əlaqədar araşdırma aparılır. Müdafiə Nazirliyinin rəhbərliyi dünyasını dəyişmiş əsgərlərimizin valideynlərinə və doğmalarına dərin hüznlə başsağlığı verir və səbir diləyir.ANN.Az