60-dan çox Azərbaycan vətəndaşı İran sərhədini keçib - XİN

İsrail və İran arasında yaranmış mövcud qarşıdurma ilə əlaqədar Azərbaycanın İsrail və İrandakı Səfirliyində,habelə Təbriz şəhərindəki Baş Konsulluğunda yaradılmış qaynar xətlərə daxil olan müraciətlərə gündəlik əsasda baxılır.Bu barədə Xarici İşlər Nazirliyinin mətbuat katibi Ayxan Hacızadənin açıqlamasında deyilir.

"İranı tərk etmək istəyən Azərbaycan Respublikası vətəndaşlarının, eləcə də, digər ölkələrin vətəndaşlarının quru sərhədindən keçidi istiqamətində müvafiq icazələrin alınması üçün tədbirlər davam etdirilir. İsraildə vətəndaşlarımız müvafiq olaraq qonşu Misir və İordaniyaya yönləndirilir.

İndiyə qədər İrandakı Səfirliyimiz və Baş Konsulluğumuza ümumilikdə 500 nəfərə yaxın Azərbaycan vətəndaşının müraciəti daxil olub, onlardan 60 nəfərdən artıq vətəndaşımız sərhədi keçib. Bununla yanaşı, 51 ölkədən 1200-dən artıq müraciət hal-hazırda nəzərdən keçirilir və onların sərhəddən keçidinə müvafiq icazələr təmin olunur.

İsraildə olan 34 nəfər vətəndaşımızın İordaniyaya keçidi üçün müvafiq tədbirlər görülüb", - Hacızadə qeyd edib.