Dünya bazarında "Brent" markalı neftin qiyməti qısamüddətli perspektivdə 59 dollar/barelə qədər yüksələ bilər.
"Report"un analitik qrupu neft hasil edən ölkələrdən gələn son məlumatlar əsasında "Brent"in qiymətinin yüksələcəyini proqnozlaşdırır. Belə ki, bu gün ABŞ-da açıqlanacaq həftəlik neft və benzin ehtiyatları göstəricilərində azalma gözlənilir. Neft ehtiyatlarının artım tempinin keçən həftə açıqlanan 3,38 mln. bareldən 2,8 mln. barelə qədər azalması, benzin ehtiyatlarının isə 1 mln. barel azalması gözlənilir.
"Bundan əlavə, dünən Liviya və Braziliyadan gələn xəbərlər neft qiymətlərinin artmasına dəstək olub. Belə ki, Liviya Milli Neft Korporasiyası hasilatla bağlı fors-major hal elan edib. Bu da o deməkdir ki, şirkət istədiyi vaxt hasilatı dayandıra bilər. Ötə yandan Braziliyanın 40-qan çox neft platformasının işçiləri dövlət şirkəti olan "Petroleo Brasileiro SA"nın aktivlərinin satılmasına qarşı etiraz yürüşü keçiriblər. Nəticədə, şirkət hasilatın 25% azaldığını bəyan edib", - deyə Agentlik qeyd edir.
"Report"un analitikləri hesab edirlər ki, neftin qiymətində gözlənilən artım müvəqqəti olacaq. Qısamüddətli yüksəliş Çindən gələcək mənfi göstəricilər, İran neftinin bazara çıxması, Federal Ehtiyat Sisteminin faizləri artırması ilə neft uzunmüddətli perspektivdə yenidən ucuzlaşacaq.
www.ann.az
Bizi sosial şəbəkələrdə izləyin !
