Putin Rusiya iqtisadiyyatının vəziyyətindən narahatdır - Reuters

Agentliyin mənbələrindən birinin sözlərinə görə, Rusiya prezidenti müharibənin əsas məqsədlərinin artıq yerinə yetirildiyini düşünür.

Reuters qeyd edir ki, Putin belə nəticələrə gələn bir vaxtda ABŞ-ın yeni prezidenti Donald Tramp Rusiyanın Ukraynaya qarşı müharibəsini mümkün qədər tez bitirməyə çağırır.

Agentliyin beş anonim mənbəsi Putinin müharibənin Rusiya iqtisadiyyatına ciddi təsirini dərk etdiyini bildirib.

Məqalədə qeyd olunur ki, genişmiqyaslı işğalın başlamasından sonra Qərbin tətbiq etdiyi geniş sanksiyalara baxmayaraq Rusiya iqtisadiyyatı sabit şəkildə böyüməkdə davam edib, lakin ölkədə inflyasiya sürətlə artıb və işçi qüvvəsi çatışmazlığı yaranıb.

Reuters mənbələrinin məlumatına görə, Putinin iqtisadiyyatdan narazılığı xüsusilə dekabrın 16-da Rusiya biznesmenləri ilə görüş zamanı hiss olunub. Görüşdə o, hökuməti sərt şəkildə tənqid edib.

Agentliyin mənbələrindən birinin sözlərinə görə, prezident ən çox yüksək kredit faizlərinin özəl investisiyaların azalmasına səbəb olmasından narahat olub.

Bundan əlavə, başqa bir mənbənin sözlərinə görə, Putin müharibənin əsas məqsədlərinin artıq yerinə yetirildiyini hesab edir. O cümlədən, Rusiyanın əsas ərazisini Krımla birləşdirən torpaqların nəzarət altına alınması və Ukrayna ordusunun zəiflədilməsi kimi məqsədlər yerinə yetirilib.

Cümə axşamı səhər Kremlin mətbuat katibi Dmitri Peskov Reuters-in bu məqaləsinə şərh verməkdən imtina edib.