Qazaxıstan AZAL təyyarəsinin qəzası ilə bağlı ilkin hesabatı dərc edib

Aktau hava limanı yaxınlığında qəzaya uğrayan "Azərbaycan Hava Yolları” QSC-nin (AZAL) təyyarəsinin qalıqlarına baxış zamanı çoxlu dəliklər və mənşəyi məlum olmayan metal parçaları aşkar edilib. Bu barədə Qazaxıstan hökumətinin saytında dərc edilmiş ilkin hesabatda deyilir.

Quyruq hissəsində, omurgada, stabilizatorda, həmçinin sol qanadda və mühərrikdə müxtəlif ölçülü deşiklər və kor dəliklər aşkar edilmişdir. Onlardan bəziləri müntəzəm düzbucaqlı formaya malikdir.

Dağıntılar arasında yad metal əşyalar aşkar edilib. Onların fotoşəkilləri hesabata əlavə olunub, lakin mənşəyi hələ müəyyən edilməyib. Dəymiş ziyanın səbəblərini müəyyən etmək üçün ekspertizalar təyin edilib, o cümlədən metal qırıqlarının təhlili aparılıb.

Məlumatda həmçinin qeyd olunub ki, təyyarənin hər iki GPS qurğusu işləmir.

 

Dekabrın 25-də AZAL-a məxsus sərnişin təyyarəsi Qazaxıstanda qəzaya uğrayıb. Təyyarədə olan 67 nəfərdən 29 nəfəri sağ qalıb. 
 
Sərnişin təyyarəsi Rusiya tərəfindən vurulub. Rusiya prezidenti Vlodimir Putin baş verən qəzaya görə Azərbaycan Prezidentinə zəng edərək üzr istəyib. 
 
Baş verən qəzadan sonra dekabrın 26-da Azərbaycanda matəm günü elan edilib. 
 
Həmçinin qəzada olan 2 pilot və bir bələdçi Prezidentin sərəncamı ilə Milli Qəhrəman adını alıb. Qəzada sağ qalan digər iki bələdçi isə rəşadət ordeni ilə təltif olunub. 
 
Gülnar Nazimqızı