QHT Şurasının fəaliyyəti dondurulub: Qurumun ləğvinə hazırlıq getdiyi bildirilir

Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının qrant layihələri ilə bağlı fəaliyyəti dondurulub.

Son günlər sosial şəbəkələrdə yayılan bu məlumat reallığı əks etdirir.

Belə ki, QHT Şurası hər ilin sonunda – noyabr-dekabr aylarında növbəti ilin ilk qrant müsabiqəsini elan edirdi. Lakin ötən ilin dekabrında, ümumiyyətlə, indiyədək 2021-ci il üzrə hər hansı qrant elanı verilməyib. Şuranın sonuncu qrant müsabiqəsi 2020-ci ilin iyununda elan edilib – 7 istiqamət üzrə.

AFN.az-a daxil olan məlumata görə, Şura rəhbərliyinin yaydığı açıqlamalara rəğmən, Hesablama Palatası qurumda çox ciddi pozuntular aşkarlayıb. Hələlik pozuntularla bağlı Baş Prokurorluğa müraciət edilməsə də, audit başa çatan kimi – 2020-ci ilin son aylarında vəziyyətlə bağlı ölkə rəhbərliyinə məruzə olunub. Ölkə rəhbərliyinin tapşırığı əsasında Şuranın fəaliyyətinin tamamilə yenidən təşkil olunması istiqamətində hazırlıqlar başladılıb. 2021-ci il üzrə qrant müsabiqəsinin yubanması da bu işlərlə bağlıdır. İşlər yekunlaşandan sonra Şuranın publik hüquqi şəxsə çevrilməsi istiqamətində hüquqi addımların atılacağı, rəhbərliyin yenilənəcəyi gözlənilir.

Əldə etdiyimiz məlumata görə, Hesablama Palatasının 2020-ci ildəki fəaliyyətinə dair hesabatı müzakirə olunarkən QHT Şurasının fəaliyyəti ilə bağlı iqtidar deputatları tərəfindən Milli Məclisdə kəskin tənqidlər səsləndiriləcək...
www.anews.az