ANS TV-nin məlumatına görə, meyvə baglarında kütləvi yığım müşahidə olunmasa da, bağ sahibləri fərdi şəkildə yığımı həyata kecirirlər. Bağbanlarla söhbət zamanı, Qubada meyvəçilərin ağrılı problemi olan satış məsələsinin mövcudluğu hiss olunurdu. Qış sortlarından fərqli olaraq yay alma sortlarını yerində satmaq mümkün deyil.

"Artıq meyvə yığımına başlamışıq. Kənardan da kömək gətirmişik. Əsas problem satış məsələsidir. Satış məsələsində olduqca çətinlik çəkirik. Çünki bunları yerində satmaq olmur”, – deyə bağban Bəhmən Cəfərov bildirib.

Meyvəçiliklə məşğul olanlardan aldığımız məlumata görə, almanı Quba-Xaçmaz bazarlarında topdan satırlar ki, bu da onlar üçün sərfəli deyil. Çünki, il ərzində bağa çəkilən xərcin müqabilində indi əldə olunan məhsul öz maya dəyərini ödəmir. Belə ki, bağbanların Xacmaz ərazisində fəaliyyət göstərən topdan satış bazarında almanın kq-na qoyulan qiymət həqiqətən ona çəkilən xərcə baxanda çox ucuzdu.

"Meyvəni bazara maşınla gətiririk və hər yeşiyinə 1 manat pul ödəyirik. Bundan başqa fəhlə yığdığı meyvənin hər yeşiyinə 60-qəpik alır. Gətirib 30-40 qəpik arası satırıq”, – deyə bağban Cavid Cəfərov qeyd edib.

Quba İcra Hakimiyyətindən bağbanların keçən illərdə də mövcud olan satış problemilə bağlı bildirdilər ki, qurum meyvənin satış probleminə müdaxilə etmir. Bazarı kəndli özü seçir. Amma qış alma sortlarını saxlamaq üçün rayonda 10-dan artıq soyuducu anbar vardır ki, fermerlər məhsulu istənilən vaxta qədər saxlaya bilirlər.