"Nizami" stansiyasının ən yaxşılar sırasına çıxması böyük uğurdur" - Nəsimi Paşayev

ANN.Az xəbər verir ki, qurumun sözçüsü metronun "Nizami" stansiyasının ən yaxşılar sırasına seçilməsinin birinci səbəbi oranın daxili arxitektura, memarlıq üslubu ilə bağlıdır: "Həmin stansiyanın dəhlizinə yerləşən dahi Azərbaycan şairi və mütəfəkkiri Nizami Gəncəvinin əsərlərinin nümunələri stansiyaya ayrı bir ruh verir və əgər stansiya dahi şairin adını daşıyırsa, memarlıq üslubunu da bunlarsız təssəvvür etməmək mümkün deyil”.

 

Qeyd edək ki, ötən gün "Qafqaz Xəbərləri" nəşri dünyanın ən gözəl stansiyalarının reytinqini dərc edib. Siyahıda Bakı Metropoliteninin "Nizami" stansiyası da yer alıb.

"Nizami" stansiyası Bakı metropoliteninin ilk xəttinin sonuncu stansiyasıdır. Mühüm inzibati və elmi mərkəzlərin yerləşdiyi Bakının dağlıq hissəsinə aparan metropoliten xəttinin əvvəli burdan başlanır. Amma bu stansiyanın reytinqdə yer almasının tək səbəbi bu deyil.

Nəşrdə qeyd edilir ki, "Nizami" - eskalatorlarla təchiz edilmiş dərin stansiyadır. "Azad qadın" heykəlinin yaxınlığında yerləşir. Stansiyanın daxili hissəsinin tərtibatında milli memarlığın ən gözəl nümunələrindən istifadə edilib.

Dahi Azərbaycan şairi Nizami Gəncəvinin şərəfinə adlandırılmış "Nizami" stansiyası Bakı Metropoliteninin ən gözəl işlənmiş stansiyalarından biridir. Bu stansiya SSRİ xalq memarı akademik M. Useynovun layihəsi üzrə inşa edilib. Yeraltı metro stansiyasını Nizami Gəncəvinin mozaika portreti və onun əsərlərinin pannosu bəzəyir.