ABŞ İranı nüvə sammitinə dəvət etmədi

ABŞ İranı Nüvə Təhlükəsizliyi Sammitinə dəvət etməyib. ANS PRESS-in məlumatına görə, bu barədə Ağ Ev yanında Milli Təhlükəsizlik Şurasının direktoru Lora Holqeyt deyib.  Onun sözlərinə görə,  Vaşinqton hesab edir ki, bütün iştirakçılar prosesdə konstruktiv rol oynamalıdırlar. 

"Sammitin hədəfi  ümumdünya diskussiya üçün arena olmaq yox, müxtəlif yanaşma və perspektivi olan ölkələr arasında məsuliyyətli diskussiyalar üçün bir meydança olmaqdır”, - deyə  Ağ Ev rəsmisi bildirib.  

"Biz ölkələrin konstruktiv rol oynayacağını gözləyirik. Ona görə də İran dəvət almayıb”.    

Vaşinqtonda nüvə sammiti mart ayının 31-də işə başlayacaq. Sammitdə dünyanın onlarla ölkəsinin rəhbər şəxsləri iştirak edəcək. Azərbaycan prezidenti İlham Əliyev də sammitdə iştirak üçün dəvət alıb. 

Son vaxtlar İran və ABŞ arasında münasibətlərdə istiləşmə hiss edilir. Ötən il 14 iyulda İranla Altılıq  ölkələri arasında razılaşma ələdə olunub. İran və dünyanın altı dövləti - ABŞ, Britaniya, Fransa, Çin və Rusiya, eləcə də Almaniya arasında danışıqlar 2006-cı ildə başlayıb. ABŞ konqresi bu razılaşmaya qarşı çıxsada prezident Barak Obama razılaşmanın lehinə addımlar atdı. Nəticədə isə İranla 30 ildən çox davam edən soyuq münasibətlər istiləşməyə başlayıb.

Bu ilin yanvar ayında isə İran üzərindən  beynəlxalq sankisyalar götürülüb. Sanksiyaların ləğvini Beynəlxalq Atom Enerjisi Agentliyinin (BAEA) təsdiq edib. Bununlada rəsmi Tehran nüvə razılaşmasında üzərinə götürdüyü bütün razılaşmaları yerinə yetirib. Razılaşma əldə olunduqdan sonra İranın beynəlxalq banklarda dondurulan pullarının bir hissəsi geri qaytarılıb. Həmçinin rəsmi Tehran Avropa dövlətləri ilə əməkdaşlıq etməyə başlayıb.