Türkiyə Rusiyaya “İncirlik” aviabazasından istifadə etməsinə icazə verə bilər

 

ANN.Az-ın APA-ya istinadən xəbərəinə görə, bunu Rusiyanın Federasiya Şurasının beynəlxalq işlər üzrə komitəsinin üzvü İqor Morozov "RİA Novosti”yə müsahibəsində bildirib.    

"Türkiyə Suriyada antiterror əməliyyatların aparılması üçün Rusiyanın Hərbi-Kosmik Qüvvələrinə "İncirlik” aviabazasından istifadə etməsinə icazə verə bilər. Bu Türkiyə prezidenti Rəcəb Tayyip Ərdoğanın Rusiyaya doğru atdığı addımlarının məntiqi davamı ola bilər”, - deyə İqor Morozov qeyd edib.     

O qeyd edib ki, belə bir qərar Suriya və İranın Rusiyaya "Xmeymim” və "Həmadan” aviabazalarından istifadə etməsinə icazə verməsi fonunda qəbul edilə bilər.  

Rusiya  Federasiya Şurasının müdafiə və təhlükəsizlik komitəsinin sədri Viktor Ozerov ötən həftə Sankt-Peterburqda Rusiya və Türkiyə prezidentləri arasında baş tutmuş danışıqlardan sonra Türkiyənin bu cür qərar verəcəyini istisna etməyib: "Görüş zamanı Ərdoğan Suriyada terrorçulara qarşı mübarizədə Türkiyənin Rusiyanı dəstəkləməyə hazır olduğunu bəyan edib”.

"Demək olmaz ki, Rusiyanın "İncirliyə” ehtiyacı var, lakin bu cür qərar Türkiyənin terrorçulara qarşı mübarizədə Rusiya ilə əməkdaşlığa sözdə yox, əməldə hazır olması kimi  səciyyələndirmək olar”, - deyə Ozerov bildirib.