Bəşər Əsəd: "Suriyada atəşkəs olmayacaq" - Son vəziyyət

ANN.Az "Əl-Cəzirə” telekanalına istinadən xəbər verir ki, bu barədə Suriya prezidenti Bəşər Əsəd "Əl-Vətən” qəzetinə müsahibəsində məlumat verib. Əsəd bildirib ki, Şam hökuməti çərşənbə günü baş verən döyüşlərdə Hələbin qədim küçələrini ələ keçirməklə, mühüm irəliləyiş əldə edib.

 

Suriya hökumətinə məxsus "SANA” agentliyinin məlumatına görə, ordu eyni gündə Bab Əl Neyrib, Əl Maadi və Salihin ərazilərini ələ keçirib. 

 

 

Jurnalistin "Suriyada atəşkəs olacaqmı?” sualına cavab verən Bəşər Əsəd bildirib ki, bu barədə təbii ki, heç bir addım atılmayacaq:

"Xüsusilə, ABŞ Suriyada atəşkəsin əldə edilməsi üçün təkid edir. Çünki onların Suriyadakı terrorçu agentləri çətin vəziyyətdə qalır. Rejim qarşısında davamlı ərazilər itirən müxaliflər mülki əhalinin və yaralıların döyüş bölgələrindən təxliyyə edilməsi üçün 5 günlük atəşkəs olunmasını təklif etdilər. Müxaliflərin bu təklifini ABŞ, İngiltərə, Fransa, Almaniya və Kanada da dəstəkləmişdi”.

ABŞ-la Hələb mövzusunda görüşlər aparıldığını bildirən rəsmi Moskva artıq mühüm addımların atıldığını qeyd edib.

 

 

"Bu istiqamətdə razılaşma əldə edilməsinə çox yaxınıq. Lakin gözləntilər barədə təmkinli davranmaq lazımdır”.

 

Rusiya xarici işlər naziri Sergey Lavrov və amerikalı həmkarı Con Kerri çərşənbə günü Almaniyanın Hamburq şəhərində görüşüb. Rəsmi Kremldən verilən məlumata görə, çərşənbə günü müxaliflərin Hələbdən təhlükəsiz şəkildə çıxışının təmin edilməsi üçün ABŞ-la hələ də danışıqlar aparılıb.

Beynəlxalq Qızıl Xaç Komitəsi (BQXK) 150 nəfər yaralı və əngəlli şəxsin təxliyyə edildiyini açıqlayıb. Qurumdan verilən məlumata görə, Hələbdə yerləşən Dar Əl Şəfa xəstəxanasında olan yaralıların təxliyyəsi gecə saatlarında həyata keçirilir. Bu isə Hələb tarixində ilkdir.

 

 

"Döyüşlər şiddətləndiyindən, cəbhə xətti də daralırdı. Buna görə də, mülki əhali çox çətin vəziyyətdə qalmışdı. Döyüşlərin bir qədər zəiflədiyi gecə saatlarında 150 nəfəri təxliyyə etdik. Onlardan 118 nəfər bölgədəki 3 ayrı xəstəxanaya yerləşdirilib. 30 nəfər isə sığınacaqlardakı səyyar xəstəxanalarda tibbi xidmətlə təmin edilib”.

 

Müxaliflərin nəzarətindəki ərazilərin azad olunması üçün mühüm işlər görən "Ağ maskalılar” adlı Mülki Müdafiə Təşkilatı döyüşlər zamanı atılan bombalar səbəbindən 61 nəfər mülki sakinin öldüyünü, 120-dən artıq insanın yaralandığını açıqlayıb.

"Əl-Cəzirə” telekanalının əldə etdiyi məlumata görə, bombardmandan qaçmaq istəyən onlarla sakin öldürülüb. Məlumatlarda bildirilir ki, hələ də, onların cəsədləri tapılmayıb.

Suriyanın "SANA” agentliyinin yaydığı xəbərə görə, ölkənin qərbində rejimin nəzarətində olan ərazilərə atılan bombalar nəticəsində 14 nəfər ölüb, 70-dən çox sakin ağır yaralanıb. 

 

 

Noyabrın 28-dən etibarən Əsəd rejimi qarşısında davamlı məğlubiyyət yaşayan müxalif qüvvələr son 10 gün ərzində əllərində olan ərazilərin 80%-dən çoxunu itirib. Məlumata görə, Əsəd rejiminin mühasirəsində olan müxalif düşərgələrdən xeyli sayda mülki sakin qaçıb.

 

 

Qeyd edək ki, Suriyada 2011-ci ilin martından başlayan və 5 il yarımdan çox davam edən döyüşlər nəticəsində 300 mindən artıq insanın öldüyü, Suriya əhalisinin yarıdan çoxunun evsiz qaldığı bildirilir.

 

* Yazıda "AlJazeera", Reuters" və "İnterfax" agentliklərinin məlumatlarından istifadə edilib.