İraqın baş naziri ABŞ prezidenti ilə görüşəcək

"İŞİD hər gün İraqda yenilir. İraq hərbçiləri koalisiya qüvvələrinin dəstəyi ilə 50 min kvadratkilometrədək ərazini terrorçulardan azad edib".

"ANNt" "Habertürk"ə istinadən xəbər verir ki, bunu ABŞ-ın İŞİD-lə mübarizə koalisiyasının xüsusi nümayəndəsi Brett MakQark Birləşmiş Ştatların İraqın paytaxtı Bağdad şəhərindəki səfirliyində jurnalistlərə açıqlamasında bildirib.

O, qeyd edib ki, İŞİD-in bir zamanl işğal etdiyi ərazilərin yarıdan çoxu geri qaytarılıb. "Koalisiya qüvvələrinə aid təyyarələrlə edilən hücumlarla İŞİD-in rəhbər heyətindən 180 nəfər öldürülüb. Qruplaşmanın yardım yolları kəsilib və xarici döyüşçülərin axışına maneə törədilib" – deyə o əlavə edib.

Brett MakQarkın sözlərinə görə, İŞİD mühasirədədir və onun yenilməsi an məsələsidir. İraqa dəstəyin ABŞ-ın milli təhlükəsizliyinin əsas məsələlərindən olduğunu söyləyən MakQark "İraq ilə əlaqələrimiz davam edəcək" – deyə vurğulayıb.

ABŞ təmsilçisi həmçinin vurğulayıb ki, İraqın baş naziri Heydər əl-İbadi Birləşmiş Ştatlara səfər edəcək və prezident Donald Trampla görüşəcək. MakQark bunun "tarixi ziyarət" olacağını qeyd edib.