Polad Bülbüloğlu: "İngilis dilini ingilislər kimi bilmirəm"

İstiPress xəbər verir ki, bunu jurnalistlərə Azəbaycanın Rusiyadakı səfiri, YUNESKO-nun baş direktoru vəzifəsinə namizəd Polad Bülbüloğlu deyib.

O bildirib ki, namizədlərin hamısı güclüdür: "Hələ qarşıda 5 ay var. Hər şeyin necə olacağını görəcəyik".

P.Bülbüloğlu onun Parisdə ingilis dilində zəif çıxış etməsi ilə bağlı tənqidlərə toxunaraq qeyd edib ki, ingilis dilində bir çox mədəniyyət nazirlərindən daha yaxşı danışır: "Dil məsələsi mübahisəlidir. YUNESKO-da da 6 əsas dil keçərlidir. Bunlardan biri rus dilidir. Mən bu dili mükəmməl bilirəm. Orada tələb oldu ki, ingilis və ya rus dili olsun. Bütün hallarda mən suallara cavab verdim. Mən ingilis dilini ingilislər kimi bilmirəm. Qarşıda 5 ay var, mən hələ hazırlaşacağam".

P.Bülbüloğlu vurğulayıb ki, əsas məsələ insanın beynindəkilər, onun hansı ideyaları irəli sürməsidir: "Bu gün bu quruma onun problemlərini həll edə biləcək qətiyyətli, yeni ideyalar və yanaşmalar, islahatlar təklif edə bilən adam lazımdır. Mənim krizis menecment sahəsində çox gözəl təcrübəm var. Mən Sovet İttifaqı dağılan dövrdə Azərbaycanın mədəniyyət naziri olmuşam".