Paşinyan Putinə Azərbaycanla bağlı nələr deyib? - DETALLAR

Putin və Paşinyan görüşdən öncə mətbuata açıqlamalarında ikitərəfli əməkdaşlığın inkişaf etdirilməsi, gələcək münasibətlərin daha da möhkəmləndirilməsi kimi müsbət fikirlər səsləndirdi. Lakin Putin və Paşinyanın bağlı qapılar arxasında nələr müzakirə etdiyi maraqlıdır.

Publika.az xəbər verir ki, Ermənistan mediası qapalı görüşdə müzakirə olunan məsələlərlə bağlı bir sıra versiya irəli sürüb.

Birinci məsələ: erməni siyasi şərhçi Sarqis Artsruni iddia edir ki, Paşinyan Putindən Dağlıq Qarabağ münaqişəsində dəstək, həmçinin, Azərbaycana silah satışının məhdudlaşdırılmasını istəyib. Putinin cavabı isə diplomatik olub və Azərbaycanla Rusiya arasında ciddi əməkdaşlığın olduğunu vurğulayıb.

İkinci məsələ: Putin Paşinyandan Rusiyanın Ermənistandakı maraqlarının gələcəyi haqda soruşub. Paşinyan Moskvaya münasibətin dəyişməyəcəyini vəd edib.

Erməni şərhçi Ayk Xalatyan hesab edir ki, qapalı görüşdə Rusiya qazının Ermənistana daha güzəştli şəkildə satılması, ikitərəfli ticarətin artırılması və s. məsələlər də müzakirə olunub.

Lakin bu görüşün daha çox tanışlıq xarakteri daşıdığı və münasibətlərin bundan sonra aydınlaşacağını düşünənlər də var.