İrandakı Azərbaycan səfirliyinə hücum siyasi mesaj ola bilərmi? - AÇIQLAMA

 

Azərbaycan Xarici İşlər Nazirliyi bəyanat yayaraq hadisənin araşdırılacağı və təfərrüatı barəsində ictimaiyyətə məlumat verəcəyini bildirib.
 
İrandakı Azərbaycan səfirliyinə hücum Azərbaycana hər hansı bir mesaj ola bilərmi? 

 

Milli Məclisin beynəlxalq münasibətlər komitəsinin üzvü deputat Sabir Rüstəmxanlı bunun hər hansı qüvvələr tərəfindən bir təxribat olduğunu açıqlayıb. 

 

"Bu hadisəni çox ciddi təxribat kimi qiymətləndirmək olar. Son çıxışlarımızda İranda yaşayan vətəndaşlarımızla bağlı bir çox tələb və istəklərimiz var idi, amma bununla yanaşı son günlər Azərbaycan və İran xarici işlər nazirlərinin çox yüksək diplomatik görüşləri olub. Bu görüşlər də iki ölkə arasında iqtisadi və siyasi əlaqələrin güclənməsi istiqamətində irəliləyirdi. Hesab edirəm ki, səfirliyə edilən hücum təxribatdır. İnanmıram ki, İran rəsmi dairələri bu işdə maraqlı olsunlar. Bu işdə başqa qüvvələrin əli var. Erməni və Avropa ölkələri bu işdə maraqlı ola bilərlər. Hansı ki, onlar Azərbaycan-İran münasibətlərinin normallaşmasını istəmirlər. Bu məsələ diqqətlə araşdırılmalıdır və İran rəsmiləri Azərbaycanın nə qədər narazı olduğunu anlamalıdır" - deputat bildirib. 

 

 

Siyasi məsələlər üzrə ekspert Elxan Şahinoğlu bildirib ki, baş verən hadisənin qatilləri tapılsa da, iki ölkə arasında münasibətlərdə əlavə gərginlik mənbəyi kimi qalacaq. 

 

"Səfirliklərə hücum və diplomatların öldürülməsi üzrə İran dünyanın "lider” dövlətlərdəndir. İrandakı fanatiklər yüz illər əvvəl Rusiya imperiyasının səfirini öldürməkdən tutmuş İslam inqilabı dövründə ABŞ səfirliyinə hücuma və diplomatların girov götürülməsinə qədər uzun yol qət edib. Ancaq İranın sözdə dost və tərəfdaş adlandırdığıı müsəlman ölkəsinin Tehrandakı səfirliyinə hücumu xatırlamıram. Bunu da etdilər. Qatillər və onların arxasındakı güc və güclər tapılsa belə, son hadisə iki ölkə arasındakı münasibətlərdə əlavə gərginlik mənbəyi olaraq qalacaq" - ekspert bildirib. 

 

İrandakı Azərbaycan səfirliyinə hücum edən şəxs Yasin Hüseynzadə artıq saxlanılıb. Bu barədə İran mətbuatına Tehran polisinin komandiri general Hüseyn Rəhimi  məlumat verib. Onun sözlərinə görə hadisəni törədən şəxs səfirliyin binasına iki uşaqla daxil olub və  ilkin sorğu-sual zamanı hücum edən şəxs atışmanın motivi kimi "şəxsi və ailə problemlərini” göstərib.

 

Gülnar Nazimqızı