Metro ticarəti məsələsi Milli Məclis müzakirəsində

Azərbaycan Milli Məclisinin bu gün keçirilən iclasında Bakı Metropolitenində ticarət obyektlərinin yığışdırılması ilə bağlı yaranan narazılıq barədə məsələ qaldırılıb.APA-nın məlumatına görə, deputat Fazil Mustafa hökumətin hesabatının müzakirəsi zamanı bildirib ki, metrodakı anti-sanitar vəziyyət, adamların gediş-gəlişində problem yaranması həqiqətən narahatedicidir. O qeyd edib ki, metronun giriş-çıxışı açıq olmalıdır: “Amma nəzərə almalıyıq ki, Azərbaycanda istənilən sahibkar heç bir nöqtəni də pulsuz əldə etmir. Qeyri-qanuni yollarla oranı əldə edir və maliyyə sərf edir. Günün birində onların əlindən hər şey alınır və həyatı məhv edilir. Çünki onun əlində heç bir hüquqi sənəd yoxdur. Hamının obyekti var. Amma heç kim mülkiyyət sahibi deyil. Belə obyektlərə təkcə metroda yox, digər ticarət mərkəzlərində də rast gəlinir. Dövlət bununla bağlı ciddi tədbirlər görməli, vətəndaşın bu problemini həll etməyə çalışmalıdır”. Deputat başqa bir təkliflə də çıxış edib: “Bu gün Ukrayna ilə müqayisədə görürük ki, kifayət qədər xərc çəkilməsinə baxmayaraq, ordu heç bir iş görə bilmir. Çünki biz post-sovet ölkələrinin qarşısında duran elə bir gücdür ki, nə qədər bahalı silah alsaq da, ona heç nə edə bilməyəcəyik. Bu yaxınlarda Gürcüstanın keçmiş prezidenti Saakaşvilinin maraqlı bir etirafı oldu. O dedi ki, kaş mən orduya çəkdiyim o xərcdən kəsib heç olmasa 100 gürcü gənci Avropaya artıq oxumağa göndərərdim. Bu daha sərfəli olardı. Mən də hesab edirəm ki, Azərbaycan da reallıqla hesablaşıb buna fikir verməlidir”.ANN.Az