Saxta pul hazırlamağın cəzası nədir? - HÜQUQŞÜNAS MƏSLƏHƏTİ

Saxta pul nişanlarının hazırlanması və satışı ilə məşğul olan şəxslər cinayət məsuliyyəti daşıyırlar. Cinayət Məcəlləsinin 204-cü maddəsinə əsasən, satış məqsədilə saxta pul, qiymətli dövlət kağızları və ya xarici valyuta, yaxud xarici valyutada ifadə olunan qiymətli kağızları hazırlama, habelə əldə etmə və ya satma əmlakı müsadirə olunmaqla və ya olunmamaqla 5 ildən 7 ilədək müddətə azadlıqdan məhrum etmə ilə cəzalandırılır. 

 

 

Hüquqşünas Arzu Əliyevanın sözlərinə görə, saxta pul hazırlamaq və dövriyyəyə buraxmaq ayrı-ayrılıqda bir cinayət hesab olunur.

 

"Bu cinayət əməlini həyata keçirən şəxslər təkcə saxta pul hazırlamaq maddəsinə görə yox, həm də həmin pulları dövriyyəyə buraxdıqlarına görə  cəzalandırılırlar. Çünki bu əməl ayrılıqda birbaşa dələduzluq əməli hesab olunur", - hüquqşunas bildirib.

 

Eyni əməllər xeyli miqdarda və ya əvvəllər saxta pul və ya qiymətli kağızlar hazırlama, əldə etmə və ya satmağa görə məhkum olunmuş şəxs tərəfindən törədildikdə əmlakı müsadirə olunmaqla 7 ildən 10 ilədək müddətə azadlıqdan məhrumetmə ilə cəzalandırılır. Qeyd olunan əməllər mütəşəkkil dəstə tərəfindən və külli miqdarda törədildikdə əmlakı müsadirə olunmaqla 8 ildən 12 ilədək müddətə azadlıqdan məhrumetmə cəzası tətbiq edilir.