Quş qripi epidemiyaları insanlar üçün təhlükə yaradır

Quş qripinin hal-hazırkı epidemiyaları ev quşları, çöl quşları və bəzi məməlilər də daxil olmaqla heyvan populyasiyalarında çətinliyə  səbəb olub, fermerlərin dolanışıq vasitələrinə və ərzaq ticarətinə ziyan vurub. Bu virus əsasən heyvanlara təsir etsə də, bu epidemiyalar insanlar üçün davamlı risklər yaradır.

Birləşmiş Millətlər Təşkilatının Ərzaq və Kənd Təsərrüfatı Təşkilatı (FAO), Ümumdünya Səhiyyə Təşkilatı (ÜST) və Ümumdünya Heyvan Sağlamlığı Təşkilatı (WOAH) ölkələri mümkün qədər çox heyvanı xilas etmək və insanları qorumaq üçün sektorlar üzrə birgə işləməyə çağırıb.

"Quş qripi virusları normal olaraq quşlar arasında yayılır, lakin məməlilər arasında H5N1 quş qripinin aşkarlanması hallarının artması narahatlıq yaradır. Bundan əlavə, bəzi məməlilər qrip virusları üçün daşıyıcı  rolunu oynaya bilər, bu da heyvanlar və insanlar üçün daha zərərli ola biləcək yeni virusların yaranmasına səbəb ola bilər”, - WOAH-ın Elm Departamentinin rəhbəri Dr. Qreqorio Torres bildirib.

Virusun məməlilər, o cümlədən insanlar arasında daha asan yayılmasına kömək edə biləcək virusda hər hansı dəyişikliyi müəyyən etmək üçün araşdırmalar davam edir.

AQTA-nın bu ilin 10-14 aprel tarixlərində ölkə ərazisində keçirdiyi epizootoloji monitorinqlərdə vəhşi quşlara ümumi baxış keçirilib. Xəstəlik törədicisinin aşkar edilməsi məqsədilə ovlanmış 70 baş müxtəlif növ vəhşi quşun patoloji materialları götürülüb. 

Əlavə olaraq monitorinqlərin aparıldığı dövr ərzində təbiət ərazilərində, ailə və fermer təsərrüfatlarında quduzluq və xırdabuynuzlu heyvanların taunu xəstəliklərinə həssas heyvanlar arasında müşahidələr aparılıb və xəstə və ya tələf olmuş heyvanlara rast gəlinməyib.

2022-ci ildə beş qitənin 67 ölkəsi ev quşlarında və çöl quşlarında H5N1 yüksək patogenli quş qripi epidemiyaları barədə məlumat verib, təsirə məruz qalmış fermalarda və kəndlərdə ölüm və ya kəsilmə nəticəsində 131 milyondan çox ev quşu itib.
 
Rabia Hale Seferoğlu

www.anews.az