ABŞ Qubad İbadoğlunun həbsi ilə bağlı vəziyyəti diqqətlə izləyir

"Biz Qubad İbadoğlunun həbsini diqqətlə izləyirik. Birləşmiş Ştatlar insan hüquqlarına və əsas azadlıqlara hörmətin təşviqinə qətiyyətlə sadiq qalır. Biz Azərbaycanı öz vətəndaşlarının, o cümlədən Qubad İbadoğlunun Azərbaycanın konstitusiyasına və beynəlxalq öhdəliklərinə uyğun olaraq insan hüquqlarını və əsas azadlıqlarını qorumağa çağırırıq”, - ABŞ diplomatik missiyası vurğulayıb.

İbadoğlu iyulun 23-də günorta saatlarında saxlanılıb. Bazar ertəsi ona  Azərbaycan Cinayət Məcəlləsinin 204.3.1-ci (satış məqsədi ilə hazırlama, habelə mütəşəkkil dəstənin tərkibində saxta pul və ya xarici valyuta əldə etmə və ya satma) maddəsi ilə ittiham irəli sürülüb.  Bu maddə ilə onu 8 ildən 12 ilədək azadlıqdan məhrumetmə cəzası gözləyir. Bu gün məhkəmə onu 3 il 26 gün  müddətinə istintaq müddətinə  həbs edib.