Koronavirusun yeni ştamı sürətlə yayılır- ÜST

Omikron ştamının yeni alt növü olan "EG.5” əvəllər yayılan digər növlərdən sürətlə yoluxdurma qabiliyyəti ilə fərqlənir.

 

COVID-19-a yoluxma hallarının  yayda yüksəlməsi fonunda, Eris kimi də adlandırılan yeni COVID subvariantı EG.5 ortaya çıxıb və ABŞ-da yayılan dominant ştama çevrilib.

ABŞ Xəstəliklərə Nəzarət və Qarşısının Alınması Mərkəzinin məlumatına görə, hazırda EG.5 hər hansı digər variantla müqayisədə ölkədə COVID-19 infeksiyalarının ən əhəmiyyətli hissəsini təşkil edir.

Çərşənbə günü, avqustun 9-da Ümumdünya Səhiyyə Təşkilatı (ÜST) qlobal miqyasda yoluxma hallarının artması səbəbindən EG.5 ilə bağlı həyəcan təbili çalıb. 
 
Xəstəliklərə Nəzarət və Qarşısının Alınması Mərkəzinin ən son məlumatına görə, avqustun 5-də başa çatan iki həftəlik müddət ərzində EG.5 ABŞ-da təsdiqlənmiş yeni COVID-19 hallarının təxminən 17,3%-ni təşkil edib. 

 

ÜST-ün məlumatına görə, bu ştamma əvvəlcə  Çindən, ardınca ABŞ, Cənubi Koreya, Yaponiya və Kanadada rast gəlinib.

EG.5 virusu omikron virusunun alt nəslindəndir. ÜST-ün risk qiymətləndirmə hesabatına görə, onun sünbül zülalında əlavə mutasiya var.