Müsəlman amerikalılar Co Baydenə xəbərdarlıq edib

Bildirilib ki, Bayden administrasiyasının İsrailin Qəzzaya hücumlarına susması ABŞ-dakı müsəlmanları qəzəbləndirib.

Ölkədəki müsəlmanlar və Demokratik Partiyanın bəzi üzvləri Baydeni Qəzzada atəşkəs üçün addımlar atmağa çağırıblar, əks təqdirdə yüz minlərlə müsəlman seçicinin 2024-cü ildə keçiriləcək Prezident seçkilərində Co Baydeni dəstəkləməyəcəyini bildiriblər.

"Administrasiyanızın maliyyə və silahlanma da daxil olmaqla qeyd-şərtsiz dəstəyi, mülki insanların tələfatına səbəb olan zorakılığın davam etməsində mühüm rol oynadı və əvvəllər sizə güvənən seçicilərin etibarını sarsıtdı. Şura İsrailin Fələstin xalqına qarşı hücumlarını dəstəkləyən heç bir namizədi dəstəkləməmək və ona səs verməmək üçün səfərbər edəcək”, - Milli Müsəlman Demokratik Şurası Baydenə göndərdiyi məktubda qeyd edib.

ABŞ-da 3,5 milyon müsəlmanın 20 faizinin seçici olduğu təxmin edilir. Bu, 700 min səs deməkdir. Miçiqan kimi əyalətlərdə müsəlman seçicilər seçkinin nəticələrinə təsir edə bilər.