Azərbaycanda illik inflyasiya 10 %-ə düşüb
13.11.2023 13:29
2023-cü ilin on ayında Azərbaycanda istehlak qiymətləri indeksi ötən ilin eyni dövrünə nisbətən 110,2 %, o cümlədən ərzaq məhsulları, içkilər və tütün məmulatları üzrə 111,4 %, qeyri-ərzaq məhsulları üzrə 109,5 %, əhaliyə göstərilmiş ödənişli xidmətlər üzrə 109,1 % təşkil edib. Bu barədə Dövlət Statistika Komitəsi məlumat yayıb.
Bildirilir ki, oktyabrda isə istehlak qiymətləri indeksi sentyabrla müqayisədə 100,4 %, ötən ilin oktyabr ayına nisbətən 103,9 % olub.
Oktyabrda qeyri-ərzaq məhsulları üzrə istehlak qiymətləri indeksi sentyabrla müqayisədə 100,1 %, ötən ilin eyni dövrünə nisbətən 104,7 % olub. Qeyri-ərzaq məhsullarından artım əsasən paltaryuyan maşınların, sementin, kəsilmiş taxtaların, azalma isə mobil telefonların və planşet tipli kompüterlərin qiymətlərində müşahidə olunub. Digər qeyri-ərzaq məhsullarının qiymətlərində ciddi dəyişikliklər baş verməyib.
Ötən ay əhaliyə göstərilmiş ödənişli xidmətlər üzrə istehlak qiymətləri indeksi əvvəlki ayla müqayisədə 100 %, ötən ilin eyni dövrünə nisbətən 104,5 % təşkil edib.
Azərbaycanda orta illik inflayasiya 10,4% səviyyəsində proqnozlaşdırılır.
Cari ilin yanvar-sentyabrında Azərbaycanda inflyasiya ötən ilin eyni dövrünə nisbətən 10,9 % təşkil edib, o cümlədən ərzaq məhsulları, içkilər və tütün məmulatları üzrə istehlak qiymətləri 12,4 %, qeyri-ərzaq məhsulları üzrə 10,1 %, əhaliyə göstərilmiş ödənişli xidmətlər üzrə 9,6 % artıb.
Prezident İlham Əliyev 2023-cü ilin 6 ayının sosial-iqtisadi yekunlarına həsr olunmuş müşavirədə bildirib ki, Azərbaycanda inflyasiyanın iki rəqəmli olacağı proqnozlaşdırılsa da ilin sonuna kimi bu rəqəmin 10%-dan az olması da mümkündür.
2022-ci ildə Azərbaycanda orta illik inflyasiya 13,9% təşkil edib.
2022-ci ildə Azərbaycanda orta illik inflyasiya 13,9% təşkil edib.
Aytac Zeynalova
www.anews.az
Son xəbərlər 
Daha çox
Foto 
Video 
