Azərbaycanda bir şagirdin təhsil xərci 1200- 7000 arası başa gəlir- Nazir

 Azərbaycanda bir şagirdin təhsil xərci 1200- 7000 arası başa gəlir. Bunu elm və təhsil naziri Emin Əmrullayev deyib.
 
O bildirib ki, məktəblərin birində təhsil alan şagirdin biri üçün 64 min manat illik vəsait xərclənir. 
 
"Burada görünən ondan ibarətdir ki, bizim orta hesabla daha çox pul xərclədiyimiz yerlərdə heç də keyfiyyətimiz yuxarı deyil. Azərbaycan məktəblərində hazırda çox qeyri-bərabər maliyyə paylanması var. Məsələn şagird sayı 0-30 olan 477 müəssisədə 7 min şagird oxuyur və biz 1 uşağa 7 min manat xərcləyirik. Bu təxminən Bakıda bəzi özəl məktəblərin qiymətinə bərabərdir. Amma biz orada heç bir keyfiyyət əldə edə bilmirik. Niyə əldə edə bilməməyimiz çox vacib sualdır. Bu əslində bir neçə şeyi göstərir. O demək deyil ki, siniflər daha az olanda məktəbdəki şagirdlər daha yaxşı oxuyur. Bu birbaşa onun isbatıdır. Eyni zamanda biz başa düşürük ki, bu müəllimdən asılıdır. Eyni zamanda da sıxlıqlaşmanın və rasionallaşmanın aparılmasının ehtiyacını göstərir. Eyni büdcə ilə daha çox şagirdimizə daha yaxşı, keyfiyyətli xidmət göstərə bilərik. Məsələn, bizim bir məktəbimizdə 1 şagird var ki, ona illik 64 min manat xərclənir. Həmin pulu o şagirdə yenə xərcləyək, mən bunun xərclənməməsi mövqeyində deyiləm, amma 64 min manatla biz o şagirdə nələr edə bilərik mövqeyindəyəm. Dövlət vəsaitinin daha səmərəli, düzgün, nəticəyönlü xərclənməsi istiqamətində rasionallaşdırma tədbirlərimizi davam etdirəcəyik, çünki bu olduqca vacib bir istiqamətdir.
Bakının böyük məktəblərinin birində bir şagirdə düşən orta xərc cəmi 600 manatdır. Amma başqa ucqar kənddə bu 30 min manatdır. Bu həm bərabər paylanma baxımından ədalətli deyil, həm də 600 manat xərclədiyimiz məktdəbdə daha yaxşı nəticə əldə edirik”, - o, Azərbaycan müəllimlərinin XVI qurultayında vurğulayıb.

 

Aytac