Azərbaycanda turizm sahəsində çalışanların sayı 6,5 dəfə artıb

Son 20 ildə Azərbaycanda turitstlərin yerləşdirilməsi və ictimai iaşə sahəsində muzdla çalışanların sayı 6,5 dəfə, bu sahə üzrə cəmi məşğulluq isə 4,1 dəfə artıb. Bunu  Azərbaycan Turizm Agentlikləri Assosiyasiyasının idarə heyətinin sədri Göydəniz Qəhrəmanov bildirib.   
 
"Son 20 ildə qeyri-neft iqtisadiyyatı 4 dəfə artaraq 0,7 faizdən 3,4 faizə kimi yüksəlib. Azərbaycanda turistlərin yerləşdirilməsi və ictimai iaşə sahəsində muzdla çalışanların sayı 6,5 dəfə, bu sahə üzrə cəmi məşğulluq isə 4,1 dəfə artıb”,  - Azərbaycan Turizm Agentlikləri Assosiyasiyasının idarə heyətinin sədri Göydəniz Qəhrəmanov Turizm Sənaye Subyektlərinin Forumunda çıxışı zamanı bildirib.
 
O həmçinin bildirib ki, Azərbaycana səfər edən  turistlərin sayında da artım var.
 
"Azərbaycana bir ildə gələn turistlərin sayı  2 milyonu keçib. Hədəflərimiz il ərzində 20 faiz artıma nail olmağı  nəzərdə tutur”,  - Qəhrəmanov deyib.
 
Onun sözlərinə görə, hazırda Qarabağ zonasında təmizləmə işləri aparılır, infrastruktur qurulur, işğaldan azad edilən ərazilər turistləri qəbul etmək üçün hazırlanır.
 
"Qarabağ yay və qış turizm imkanları zəngin olan bölgədir.  Biz bu istiqamətdə turizm marşrutlarının qurulması ilə bağlı işləri sürətlə aparacağıq. İlk növbədə Suqovuşana turlar təşkil ediləcək”, - Qəhrəmanov bildirib.
 

www.anews.az