ASCO və V.Ships əməkdaşlıq barədə razılığa gəliblər

Layihələrdən biri gəmi heyətlərinin bacarıqlarının inkişaf etdirilməsini nəzərdə tutur. Bu proqram çərçivəsində ASCO-nun yeni gəmilərində işləmək üçün yerli mütəxəssislərin hazırlanması planlaşdırılır. Proqrama uyğun olaraq, ASCO-nun gəmilərində çalışan tam ştatlı heyət üzvləri, eləcə də ASCO-nun təhsil müəssisələrində təhsil alan uğurlu tələbələr 3-6 ay müddətində V.Ships şirkətinin idarə etdiyi gəmilərdə təcrübə keçəcəklər. Proqramı uğurla başa vuranlar imtahanlardan keçdikdən sonra ASCO-nun yeni tipli gəmilərində işlə təmin olunacaqlar.

Bundan əlavə, beynəlxalq tələblərə uyğun hazırlanmış imtahan əsasında "V.Ships” komanda heyəti üzvlərinin nəzəri, praktiki bilik və bacarıqlarını qiymətləndirəcək. İmtahandan keçməyənlər xüsusi təkmilləşdirmə proqramına cəlb olunacaqlar.

Tərəflər kadr məsələsini də müzakirə ediblər. V.Ships Qara və Aralıq dənizi hövzələrində yerli kadr çatışmazlığı olan ASCO tankerlərinə və yükdaşıyıcılarına müvafiq dəstək verəcək.

Bundan əlavə, ASCO-da tətbiq olunan əməkhaqqı sistemi beynəlxalq bazarlarda tətbiq edilənlərlə müqayisə ediləcək və qiymətləndiriləcək. Nəticələr əsasında müvafiq təkliflər hazırlanacaq.

Digər əməkdaşlıq sahəsi ekipaj idarəetmə sisteminin qiymətləndirilməsidir. Bu, ASCO-ya gələcəkdə kadrların idarə edilməsi istiqamətində daha mütərəqqi metodların tətbiqinə imkan verəcək.

Bundan əlavə, ASCO-nun gəmilərindən biri V.Ships şirkətinin ShipSure rəqəmsal platformasından istifadə edəcək. Bu, 6-9 aylıq pilot layihədir, onun əsas məqsədi planlı texniki xidmət, gəmi maliyyəsi, ekipajın idarə edilməsi, satınalma sistemləri və prosesləri, SƏTƏM (ətraf mühitin sağlamlığı və təhlükəsizliyi), gəmi əməliyyatları, sənəd idarəetməsi kimi prosesləri təkmilləşdirməkdir.