Rəsmi sənədlər vahid formada yazılacaq - Azərbaycanda

Azərbaycanda rəsmi sənədlərin - ərizələrin, arayışların, müqavilələrin yazılış forması yenidən müəyyənləşdiriləcək."Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı"nın icrası ilə bağlı yaradılmış İşçi qrupunun sədr müavini, Dilçilik İnstitutunun Monitorinq şöbəsinin müdiri Həbib Zərbəliyev Trend-ə deyib ki, bu gün Azərbaycanda rəsmi ərizə, müxtəlif arayış və müqavilələri hər kəs özü bildiyi formada yazır. Buna görə də Azərbaycan dilində yazılan həmin sənədlərin vahid yazılma forması müəyyənləşməli, idarə və təşkilatlar da bu sənədlərin hazırlanması zamanı həmin formalardan istifadə etməlidirlər: "Azərbaycanda bu gün ən müxtəlif təşkilatlar ərizə formalarını, arayışları Sovet dövründən qalma ənənə ilə, rus dilindən tərcümə edilmiş formada yazırlar. Məsələn, ərizəni "Bu ərizə verilir ondan ötrü ki" kimi yazırlar. Bu isə Azərbaycan dilinə uyğun deyil".H.Zərbəliyev deyib ki, bu sahədəki çatışmazlıqları daha yaxşı öyrənmək üçün yaxın zamanlarda kargüzarlıq sahəsində monitorinqlərə başlanılması nəzərdə tutulur. Monitorinq ölkənin bütün rayonlarında ardıcıllıqla aparılacaq.Onun sözlərinə görə, monitorinq zamanı bütün təşkilat və idarələrin kargüzarlıq sənədlərini yoxlamaq imkan xaricindədir. Amma böyük qurumların kargüzarlıq sənədlərini araşdırmaq nəzərdə tutulur. Monitorinqlərin keçirilməsində məqsəd isə heç də həmin qurumların işinə hansısa formada təsir göstərmək deyil, mövcud tipik nöqsanların aradan qaldırılması üçün işlər aparmaqdır.İşçi qrupun sədr müavini bildirib ki, Dilçilik İnstitutunun alimləri ölkənin bu sahə üzrə digər bacarıqlı mütəxəssisləri ilə birgə bütün rayonlarda ardıcıllıqla reklam, afişa sahəsində də dövlət dilinin tələbələrinə riayət edilib-edilməməsi vəziyyətini araşdırmaq üçün monitorinqlər keçirəcəklər. Hazırda isə Bakı şəhərində yerləşdirilən reklamların mətnlərinin dilinin dövlət dilinin tələblərinə uyğun olub-olmadığını öyrənmək üçün monitorinqlər aparılır.İşçi qrup daha sonra mətbuatın dili ilə bağlı mövcud vəziyyəti öyrənmək üçün monitorinqlər aparacaq.ANN.Az