BP "Şahdəniz"də gündəlik hasilatı 72 mln kubmetr səviyyəsində saxlayacaq

"2023-cü ilin sonunda "Şahdəniz” yatağından 26 milyard kubmetr qaz və 4 milyon ton kondensat hasil edilib. Bu, əslində, hazırda imkanların maksimum həddidir, yəni biz qaz resursunun hasilatının pik həddinə çatmışıq”, - Aslanbəyli Azərbaycanın CBC telekanalına müsahibəsində bildirib.

Onun sözlərinə görə,  hazırda "Şahdəniz” yatağından hər gün təxminən 72 milyon kubmetr qaz hasil edilir. "Yeni layihələr sayəsində biz bu səviyyəni bir neçə il saxlamağa çalışacağıq", - vitse-prezident bildirib.

O əlavə edib ki, hazırda "Şahdəniz" yatağının şərq cinahında SDX-8 kəşfiyyat quyusunun qazılmasından əldə edilən məlumatların şərhi üzrə işlər aparılır. "Şərhin nəticələrinə əsasən, "Şahdəniz” yatağının dərin laylarında qazın həcmi barədə mühakimə yürütmək mümkün olacaq. Hazırda ekspertlərimiz və SOCAR şirkətləri bu resursların ixracı ilə bağlı həcmlər və planlar üzrə ortaq məxrəcə gəlmək üçün müxtəlif ssenariləri öyrənirlər”, - deyə Aslanbəyli bildirib.

Xəbər verildiyi kimi, 2023-cü ildə "Şahdəniz” yatağından hasilat 26 milyard kubmetr qaz (2022-ci il göstəricisinin + 4%-i) təşkil edib.

"Şahdəniz” yatağının işlənməsi üzrə müqavilə 1996-cı il iyunun 4-də Bakıda imzalanıb və həmin il oktyabrın 17-də Milli Məclis tərəfindən ratifikasiya edilib.

 

Hazırda müqavilədə tərəflərin payı belədir -  bp (operator - 29,99%), LUKOIL (19,99%), TPAO (19%), NICO (10%) və Cenub Qaz Dehlizi QSC (21 ,02%).

"Şahdəniz” yatağından qaz hasilatına 2006-cı ilin dekabrında başlanılıb.

Hazırda "Şahdəniz” yatağından qaz hasilatı Mərhələ-1 çərçivəsində Alfa platformasından və Mərhələ-2 çərçivəsində Bravo platformasından həyata keçirilir.